1% e më të pasurve në botë emetuan po aq emetime të dioksidit të karbonit sa dy të tretat më të varfër të popullsisë së planetit, pretendon një raport i ri nga Oxfam.
Emetimi i karbonit i 1% më të pasurve u rrit në 16% të totalit të botës në vitin 2019, që është e njëjta sasi e prodhuar nga pesë miliardë njerëzit më të varfër.
Chiara Liguori, këshilltare e lartë për politikat e drejtësisë klimatike në Oxfam, tha se super të pasurit “po plaçkitin planetin” ndërsa të varfërit paguajnë çmimin.
“Shkalla e madhe e pabarazisë klimatike e zbuluar në raport nxjerr në pah se si dy krizat janë të lidhura pazgjidhshmërisht – duke nxitur njëra-tjetrën – dhe nevojën urgjente për të siguruar që kostot në rritje të ndryshimeve klimatike të bien mbi ata që janë më përgjegjës dhe më të aftë për të paguar,” tha ajo.
Raporti i Oxfam-it, bazuar në hulumtimin me Institutin e Mjedisit të Stokholmit (SEI), vlerësoi emetimet e konsumit të grupeve të ndryshme të të ardhurave, sipas SkyNews.
Gjetjet e studimit nxjerrin në pah hendekun midis gjurmëve të karbonit të super të pasurve, mënyra e jetesës dhe investimet e të cilëve në lëndët djegëse fosile janë të rënda nga karboni, dhe pjesës tjetër të botës.
“Hendeku midis super të pasurve dhe ne të tjerëve është i madh,” tha zonja Liguori.
“Do të duheshin rreth 1500 vjet që dikush nga shtresa e ulët të prodhojë aq karbon sa miliarderët më të pasur në një vit. Kjo është thelbësisht e padrejtë.”
Ajo shtoi se qeveritë globalisht, përfshirë Mbretërinë e Bashkuar, duhet të trajtojnë pabarazinë dhe ndryshimet klimatike duke ” synuar emetimet e tepërta” të super të pasurve duke i taksuar më shumë.
“Kjo do të rriste të ardhurat shumë të nevojshme që mund të drejtohen për një sërë nevojash jetike për shpenzime sociale, duke përfshirë një kalim të drejtë në energji të pastër dhe të rinovueshme, si dhe përmbushjen e angazhimeve tona ndërkombëtare për të mbështetur komunitetet që tashmë po mbajnë peshën kryesore të krizës klimatike. .”
