Ish-zëvendëskryeministri Arben Ahmetaj ka paralajmëruar se në të ardhmen e afërt do flasë në hollësi për akuzat, supozimet e përtej tyre.
Ish-numri dy i qeverisë, që ndodhet në arrati e është shpallur në kërkim nga SPAK ka publikuar në faqen e tij në Facebook një raport të një firme ligjore ndërkombëtare amerikane, të cilën sqaron se e ka pajtuar për një opinion të dytë lidhur me çështjen e tij.
Ai shkruan se ndaj tij ka pasur persekutim politik prej 1 viti e gjysmë të vijuar në media të orientuara e të financuara nga inceneratorët dhe në institucionet e akuzës.
Ahmetaj sqaron se raportin në fjalë ia ka dërguar institucuioneve në vend si Ministrisë së Drejtësisë, Kryetares së Kuvendit, KLD-së e ambasadave të huaja në vend.
Përmes një mesazhi në rrjetin social ‘Facebook’, Ahmetaj i cilëson hetimet e SPAK si persekutim politik, ndërsa ka publikuar një raport prej 420 faqesh.
Statusi i plotë i Ahmetajt
Të nderuar Qytetarë,
Në vazhdën e persekutimit politik për më shumë se një vit e gjysëm, të vazhduar e orientuar në media (të financuara nga inceneratorët) dhe në institucionet e akuzës, u detyrova të kërkoja një Opinion të dytë të pavarur (Indipendent Second Opinion) nga një firmë ligjore ndërkombëtare me qendër në SHBA.
Firma ligjore “Nixon Peabody” mori në shqyrtim të gjithë raportin e SPAK paraqitur në kërkesën që ky i fundit dorëzoi në Kuvend për heqjen e imunitetit parlamentar.
Firma ligjore “Nixon Peabody” pas disa muajsh punë me bashkëpunëtorë me eksperiencë të fushës (ish-prokurorë federalë, apo ish-investigatorë të institucioneve ligjzbatuese amerikane) kanë prodhuar një raport të gjatë prej 420 faqesh duke u bazuar në standardet ndërkombëtare, prezumimin e pafajësisë dhe të drejtat themelore të njeriut.
Në raport ka dhe një përmbledhje prej 38 faqesh, ku bie në sy një nga konkluzionet e “political motivation or others…”, pra sulme te orientuara politikisht, për akuzat e ngritura ndaj meje, përmbledhje e cila mund të lexohet lehtësisht nga kushdo i interesuar.
Këtë raport ia kam dërguar Ministrit të Drejtësisë, Kryetares së Kuvendit, Kryeinspektorit Metani, si dhe disa përfaqësive të huaja të shteteve dhe institucioneve që kanë kontribuar në reformën në drejtësi.
Më poshtë kam atashuar linkun e materialit të plotë, i cili është lehtësisht i aksesueshëm.
Tashmë nuk kam më as habi, e as çuditem nga goditjet e orientuara, të kaluara, të tashme e të ardhme. Nuk kam çudi as nga standardet e aplikuara.
Në të ardhmen e afërt do të komunikoj në detaje për akuza / supozime e përtej…, shkruan Ahmetaj.
*Raportin e plotë mund ta lexoni këtu: Report and Exhibits
