Zyrtarët në Indi thanë të martën se shpëtimtarët janë vetëm 5 metra larg nga 41 punëtorët e ndërtimit që kanë mbetur të bllokuar në një tunel malor të shembur në veri të vendit për më shumë se dy javë, duke rritur shpresat se ata mund të nxirren së shpejti.
Kirti Panëar, një zëdhënës i qeverisë së shtetit, tha se dhjetëra punëtorë kishin punuar gjatë natës për të gërmuar me dorë nëpër shkëmbinj dhe mbeturina, duke përdorur mjete shpimi të mbajtura me dorë dhe duke pastruar llumin ndërsa i afroheshin asaj që shpresohet të jetë shtrirja përfundimtare e operacionit të shpëtimit.
Ekipet e shpëtimit nisën të gërmojë me duar duke lënë pajisjet e mëdha pasi makina e shpimit u prish në mënyrë të pariparueshme të premten ndërsa shponin horizontalisht nga pjesa e përparme për shkak të terrenit malor të shtetit Uttarakhand ku u shemb tuneli.
Makina kaloi rreth 47 metra nga afërsisht 57-60 metra që nevojiteshin, përpara se shpëtimtarët të fillonin të punonin me dorë për të krijuar një vendkalim për të evakuuar punëtorët e bllokuar. Autoritetet të martën thanë se ekipet e shpëtimit kishin arritur të shponin mbi 50 metra në total deri më tani.
Ekipet e shpëtimit kanë futur tubacione në zonat e gërmuara dhe i kanë bashkuar ato në mënyrë që punëtorët të mund të nxirren jashtë me barela me rrota.
Punëtorët kanë mbetur të bllokuar që nga 12 nëntori kur një rrëshqitje dheu shkaktoi që një pjesë e tunelit prej 4,5 kilometrash që po ndërtonin, të shembet rreth 200 metra ga hyrja.
Ekipet e shpëtimit filluan gjithashtu të dielën të krijojnë një kanal vertikal me një makinë shpimi të sapo zëvendësuar si një plan emergjence.
Ajo që filloi si një mision shpëtimi që pritet të zgjasë disa ditë është kthyer në javë dhe zyrtarët kanë ngurrar të japin një afat kohor se kur mund të përfundojë.
Shumica e punëtorëve të bllokuar janë punëtorë emigrantë nga i gjithë vendi. Shumë nga familjet e tyre kanë udhëtuar drejt vendndodhjes, ku kanë ngritur kampe aty pranë për ditë të tëra për të marrë informacione mbi përpjekjet e shpëtimit dhe me shpresën për të parë të afërmit e tyre së shpejti.
Autoritetet i kanë furnizuar punëtorët e bllokuar me ushqime përmes një tubi 15 centimetra pas ditësh mbijetese vetëm me ushqim të thatë të dërguar përmes një tubi më të ngushtë. Ata po marrin oksigjen përmes një tubi të veçantë dhe më shumë se një duzinë mjekë, përfshirë psikiatër, kanë qenë në vend duke mbikëqyrur shëndetin e tyre.
Tuneli që po ndërtonin punëtorët ishte projektuar si pjesë e rrugës Chardham, që do lidhë vende të ndryshme pelegrinazhi hindu. Disa ekspertë thonë se projekti, një nismë kryesore e qeverisë federale, do përkeqësojë kushtet e brishta në Himalajet e sipërme, ku disa qytete janë ndërtuar mbi mbeturinat e rrëshqitjes së dheut.
Një numër i madh pelegrinësh dhe turistësh vizitojnë tempujt e shumtë hindu të Uttarakhandit, me numrin në rritje me kalimin e viteve për shkak të ndërtimit të vazhdueshëm të ndërtesave dhe rrugëve.
