Numri i të vdekurve nga përmbytjet e shkaktuara nga ‘El Nino’ në Kenia është rritur në 136 pasi të paktën 16 persona humbën jetën në 24 orët e fundit, thanë autoritetet të enjten.
Ministria e Brendshme, e cila konfirmoi viktimat e fundit, tha se më shumë se 92,400 familje dhe 462,100 njerëz janë prekur nga përmbytjet.
Raymond Omollo, ministri i Brendshëm i Kenias, tha se qeveria po punonte për të ofruar ushqim për komunitetet e prekura.
“Fatkeqësisht, në 24 orët e fundit janë raportuar 16 vdekje, duke e çuar numrin në 136, shpërndarja e ushqimit vijon në gjithë qarqet e prekura, duke përfshirë fluturimet në zonat e paarritshme”, tha Omollo.
Përveç humbjeve tragjike të jetëve, përmbytjet shkaktuan kërdi edhe në bagëti, me të paktën 2500 kafshë të ngordhura në 24 orët e fundit.
Shirat e vijueshëm kanë shkaktuar shumë sfida, duke përfshirë përmbytjet e përhapura, rrëshqitjet e dheut dhe rrëshqitjet e baltës në të gjithë Kenia.
Kenia nuk është e vetmja në përballjen me pasojat shkatërruese të El Ninos, pasi Somalia dhe Etiopia po përjetojnë gjithashtu rrebesh të rrëmbyeshëm që kanë çuar në vdekjen e qindra njerëzve, zhvendosje të gjerë dhe shkatërrimin e infrastrukturës kritike në të tre vendet.
‘El Nino’, një dukuri klimatike e karakterizuar nga ngrohja periodike e temperaturave të sipërfaqes së detit, shkakton ndryshime të rëndësishme në modelet e reshjeve.
Ajo çon në një rritje të gjasave të ngjarjeve të skajshme të motit si përmbytjet, duke prishur ekosistemet në mbarë botën.
