Rreth 200 fermerë të Koresë së Jugut që mbarështojnë dhe rrisin qen për konsum njerëzor mbajtën një tubim të enjten pranë zyrës presidenciale në kryeqytetin Seul, duke kërkuar nga qeveria të heqë një plan për të ndaluar praktikën e diskutueshme shekullore.
Dhjetëra fermerë, të cilët kishin tentuar të dilnin në rrugën para zyrës presidenciale me kamion me qen në kafaze që synonin t’i lironin në vendngjarje, u larguan nga policia që inspektoi ngarkesën e mbuluar me batanije.
Partia në pushtet e presidentit Yoon Suk Yeol ka prezantuar një projektligj për të ndaluar mbarështimin dhe shitjen e qenve për konsum dhe do ofrojë kompensim financiar për ata që janë pjesë e industrisë dhe do jenë të detyruar të mbyllin biznesin e tyre brenda një periudhe mospagimi prej tre vitesh.
“Tani është koha për t’i dhënë fund polemikave rreth ngrënies së mishit të qenit”, kanë thënë anëtarët e parties në pushtet, duke shtuar se ka pasur mbështetje të gjerë nga partia opozitare, e cila kontrollon parlamentin si dhe nga publiku.
Më shumë se 6 milionë familje të Koresë së Jugut zotërojnë qen si kafshë shtëpiake në një vend me rreth 51 milionë banorë dhe Yoon dhe gruaja e tij Kim Keon Hee janë pronarë të gjashtë qenve.
Një sondazh i Gallup Korea vitin e kaluar tregoi se pothuajse dy të tretat e të anketuarve kundërshtuan ngrënien e mishit të qenit, me vetëm 8% që thanë se kishin ngrënë qen gjatë vitit të kaluar, nga 27% në 2015.
Ju Yeong-bong, i cili përfaqëson një grup të industrisë dhe drejtoi tubimin e së enjtes, tha se politikanët nuk kishin të drejtë të mbyllnin një industri ose të vendosnin se çfarë zgjidhnin njerëzit të hanë.
“Nuk mund të pajtohemi me idenë se është barbare, sepse të gjitha vendet që kanë traditë blegtorinë në një moment kanë ngrënë qen dhe ka ende vende ku bëhet”, tha ai.
Fermerët ishin përjashtuar plotësisht nga diskutimi mbi projektligjin dhe kompensimi financiar i propozuar ishte plotësisht i pamjaftueshëm duke qenë se ata do të humbnin mjetet e jetesës, tha Ju.
Ndërsa praktika e ngrënies së mishit të qenit ka rënë në popullaritet, fermerët dhe pronarët e restoranteve që e shërbejnë mishin kanë luftuar për ta mbajtur atë të ligjshëm.
