Këshilli i Sigurimit i OKB-së është caktuar të mblidhet të premten për të votuar nëse do të kërkojë një armëpushim të menjëhershëm në Gaza. Emiratet e Bashkuara Arabe kanë përgatitur një projekt-rezolutë që do të hidhet në votim të premten, thanë agjencitë e lajmeve, shkruan BBC.
Kjo vjen pasi Sekretari i Përgjithshëm Antonio Guterres mori masën e rrallë të invokimit të nenit 99 të kartës së OKB-së, i cili i lejon sekretarit të përgjithshëm të sjellë në vëmendje të këshillit ‘çdo çështje që sipas tij mund të kërcënojë mbajtjen e paqes dhe sigurisë ndërkombëtare’. Askush në rolin e tij nuk e kishte bërë këtë në dekada.
Në një letër drejtuar këshillit të mërkurën, Guterres tha se situata në Izrael dhe Gaza “mund të përkeqësojë kërcënimet ekzistuese për ruajtjen e paqes dhe sigurisë ndërkombëtare”.
Kjo do të jetë përpjekja e pestë për të gjetur unitetin midis anëtarëve të këshillit. Katër projekt-rezoluta të mëparshme të paraqitura që nga shpërthimi i luftës u kundërshtuan nga këshilli.
