Lista e Bloomberg ‘Familjet më të pasura në botë 2023’, e publikuar në fillim të kësaj jave, zbuloi se si shpërndarja globale e pasurisë po riformohet nga pasuritë e naftës.
Sipas vlerësimit, Familja Nahyan, familja e presidentit të Emirateve, Sheikh Mohammed bin Zayed Al Nahyan, e cila iu bashkua listës për herë të parë, doli si dinastia më e pasur në botë. Emirati i tyre në Abu Dhabi është vendi ku gjenden shumica e rezervave të naftës në Emiratet e Bashkuara Arabe. Pasuria e familjes në pushtet u vlerësua në 305 miliardë dollarë.
E dyta më e pasura është Familja Walton me bazë në SHBA, e cila zotëron shitësin më të madh në botë për nga të ardhurat, ‘Walmart’. Pasuria e tyre e vlerësuar arrin në 259.7 miliardë dollarë. Në tre vendet e para renditet dinastia franceze Hermes, e cila zotëron markën e njëjtë të modës luksoze. Pasuria e Familjes Hermes është 150.9 miliardë dollarë.
Familja Mars, e cila zotëron gjigantin amerikan të ëmbëlsirave që mban emrin e tyre, është e katërta më e pasura, me një pasuri të kombinuar prej 141.9 miliardë dollarësh.
Një tjetër hyrje e re, Familja Al Thanis, familja mbretërore e Katarit, zuri vendin e pestë në renditje me rreth 155 miliardë dollarë. Pasuria e familjes mbretërore bazohet në depozitat e mëdha të naftës në det të Katarit. Megjithatë, Al Thanis ka edhe pasuri të konsiderueshme të huaja, siç është shtëpia e modës ‘Valentino’.
Në dhjetëshen e parë renditet gjithashtu Familja Koch, pronare e korporatës petrokimike amerikane Koch Industries (127.3 miliardë dollarë) dhe Familja Saud, familja mbretërore e Arabisë Saudite, eksportuesi më i madh i naftës në botë (112 miliardë dollarë).
Ata pasohen nga Familja Ambani, pronarë të kompanisë indiane të naftës Reliance Industries (89.9 miliardë dollarë); Wertheimers, pronarë të shtëpisë franceze të modës Chanel (89.6 miliardë dollarë); dhe Thompsons, mbajtës të një aksioni kontrollues në agjencinë e lajmeve Reuters (71.1 miliardë dollarë).
Sipas llogaritjeve të Bloomberg, pasuria e kombinuar e 25 familjeve më të pasura në botë është rritur me 1.5 trilion dollarë gjatë vitit të kaluar, ose afërsisht 43%. Agjencia gjithashtu vuri në dukje se tre familjet e Gjirit të përfshira në renditje janë “ka gjasa të jenë shumë më të pasura se këto vlerësime konservatore”.
