Një grup turistësh kinezë ranë në ujë të ftohtë në Venecia pasi gondola në të cilën ndodheshin u përmbys ndërsa ata ishin ngritur në këmbë për të bërë selfie.
Sipas policisë së Venecias, pesë vizitorët notuan të sigurt drejt bregut të kanalit dhe më pas dolën nga uji. Askush nuk u lëndua gjatë incidentit të së dielës, por të paktën një nga turistët humbi një celular në aksident, që ndodhi ndërsa gondolieri po përpiqej të manovronte nën një urë të ulët, tha policia.
Nuk pati dëmtime në gondolë, por karriget dhe batanijet e saj ranë në kanal, tha një zëdhënës i shoqatës së gondolave të qytetit të enjten për CNN.
Ai konfirmoi se gondolieri i kishte udhëzuar turistët që të mos lëviznin apo të ngriheshin për të bërë selfie gjatë manovrës, por për shkak të mosnjohjes së gjuhës, turistët nuk morën vesh gjë. Shoqata kohët e fundit kufizoi numrin e turistëve në gondola nga gjashtë në pesë, me peshën maksimale për turist në 104 kg.
Tani për tani në Venecia janë 430 gondolierë të licencuar që punojnë me turne për të akomoduar turistët. Tregtia shpesh kalon nga baballarët te djemtë. Aktualisht është vetëm një gondoliere femër e licencuar.
Turistët me sjellje të keqe kanë qenë një problem vitet e fundit, me episode të dukshme duke përfshirë një burrë që u zhyt në kanal nga një ndërtesë trekatëshe dhe të tjerë të gjobitur për notim në ujë.
Ndërkohë, në maj, autoritetet nisën një hetim pasi një njollë e gjelbër misterioze e shndërroi kanalin në një ngjyrë të gjelbër fluoreshente. Ata zbuluan se një lëndë kimike ishte hedhur në ujë, por nuk dihet se si erdhi atje.
Vitin e ardhshëm, Venecia do vendosë një tarifë hyrjeje për udhëtarët ditorë në qytet për të luftuar mbiturizmin.
