Një ditë para seancës plenare ku është planifikuar në rend dite, ratifikimi i marrëveshjes mes Shqipërisë dhe Italisë për refugjatet, qytetar dhe aktivist të shoqërisë civile në Lezhë i dërguan peticion Kuvendit.
Ky peticion është firmosur nga 700 qytetarë, të cilët kërkojnë nga ligjvënësit të mos votojnë marrëveshjen. Ata thonë se ngritja e kampeve të refugjateve do të sjellë pasoja në jetën social ekonomike dhe sigurinë publike në Lezhë.
Sipas tyre, refugjatët do të cenojnë sigurinë publike në qytet. Kësaj kërkese drejtuar Kuvendit iu bashkuan Kryetarja e Partisë Demokratike në Lezhë Alfrida Marku dhe ish-Prefekti socialist Gjok Jaku.
Marrëveshja mes Shqipërisë dhe Italisë, e kthen Lezhën në qendër pritëse për refugjatet nga vendet e treta, të cilët do të hynë përmes portit të Shëngjinit dhe do të akomodohen në aerodromin e Gjadrit.
