Trupat ukrainase të vijës së parë përballen me mungesë predhash artilerie dhe kanë zvogëluar disa operacione ushtarake për shkak të mungesës së ndihmës së huaj, tha një gjeneral i lartë i ushtrisë për Reuters.
Gjenerali i brigadës Oleksandr Tarnavskyi po fliste pasi ligjvënësit republikanë bllokuan një paketë ndihme prej 60 miliardë dollarësh nga SHBA-ja dhe Hungaria bllokoi 50 miliardë euro nga fondet e Bashkimit Evropian për Kievin, ndërsa vendi lufton pushtimin rus.
“Ka një problem me municionet, veçanërisht ato post-sovjetike, predha 122 mm, 152 mm. Dhe sot këto probleme ekzistojnë në të gjithë vijën e frontit,” tha ai në një intervistë.
Tarnavskyi tha se mungesa e predhave të artilerisë ishte një “problem shumë i madh” dhe rënia e ndihmës ushtarake të huaj po luante rol në fushën e betejës.
“Vëllimet që kemi sot nuk janë të mjaftueshme për ne, duke pasur parasysh nevojat tona. Pra, ne po i rishpërndajmë ato. Ne po riplanifikojmë detyrat që i kishim vendosur vetes dhe i bëjmë ato më të vogla sepse ne duhet t’i sigurojmë ato municione.” tha ai, pa dhënë hollësi.
Komentet nënvizojnë mbështetjen e Kievit te ndihma ushtarake perëndimore për të luftuar trupat ruse përgjatë një fronti 1000 km, gati 22 muaj në konfliktin më të madh në Evropë që nga Lufta e Dytë Botërore.
Forcat ruse gjithashtu përballen me probleme me municionet, tha Tarnavskyi, pa specifikuar natyrën e tyre.
Trupat e lodhur ukrainase në frontin juglindor kanë shkuar në mbrojtje në disa zona, por po përpiqen të sulmojnë në të tjera, tha ai.
