Në shumicën e situatave, krahasimi i një kundërshtari politik me Adolf Hitlerin mund të duket si një hap i jashtëzakonshëm. Për fushatën e Joe Biden, ajo është bërë pjesë e rutinës së kandidimit kundër Donald Trump.
Kur ish-presidenti tha se emigrantët pa dokumente po “helmonin gjakun e vendit tonë” gjatë një mitingu në New Hampshire të shtunën, një ndihmës i fushatës së Biden, i ngarkuar me mbikëqyrjene e Trump, shpërndau menjëherë komentet tek stafi, sipas zyrtarëve të lartë.
Brenda pak orësh, fushata lëshoi një deklaratë duke sulmuar Trump-in se kishte “kanalizuar modelet e tij duke përsëritur si papagall Adolf Hitlerin, duke lavdëruar Kim Jong Un dhe duke cituar Vladimir Putinin ndërsa kandidonte për president me një premtim për të sunduar si diktator dhe kërcënuar demokracinë amerikane”.
Ishte hera e katërt në gjashtë javët e fundit që fushata e Biden ka krahasuar komentet e Trump me ato të Hitlerit në deklaratat me shkrim dhe ndoshta jo e fundit.
Ekipi i presidentit ka shtuar sulmet ndaj Trump-it ndërsa po shkon drejt një ripërplasjeje të mundshme me të dhe historianët thonë se komentet e fundit të Trump-it për emigrantët – si dhe ato që krahasojnë armiqtë e tij politikë me “parazitët” – u kanë bërë jehonë fjalëve të Hitlerit.
Qëndrimi më i ri agresiv i Biden-it gjithashtu nënvizon se kërcënimet ndaj demokracisë mbeten në thelb të mesazheve të fushatës së tij, edhe pse ai përpiqet të bindë njëkohësisht votuesit se i ka të gjitha aftësitë për të trajtuar ekonominë.
Është e ngjashme me strategjinë që demokratët përdorën me sukses në zgjedhjet afatmesme të 2022 – dhe një linjë që zyrtarët e lartë të fushatës thanë se daton që nga përgjigja e Trump-it ndaj tubimit të dhunshëm në Charlottesville, i cili frymëzoi kandidimin presidencial të Biden.
“Sa herë që ai e thotë atë, ne do t’ia vëmë në dukje”, tha Michael Tyler, drejtori i komunikimit i fushatës së Biden.
“Ai do që t’i bëjë jehonë retorikës së Hitlerit dhe Musolinit dhe ne do të sigurohemi që njerëzit të kuptojnë se sa serioze është kjo çdo herë.”
Qasja u informua nga takimi i Biden me një grup historianësh vitin e kaluar mbi atë që ai e shihte si kërcënime gjithnjë e më të rënda për demokracinë e vendit nga Trump dhe mbështetësit e tij. Historianët e nxitën presidentin të nxirrte zbuluar paraardhësin e tij sa herë që ai evokonte Hitlerin ose diktatorë të tjerë.
“Unë mendoj se presidenti dhe fushata e tij kanë një detyrim moral për të nxjerrë në pah dhe dënuar gjuhën që është kaq tmerrësisht nxitëse,” tha Jon Meacham, një nga historianët që mori pjesë në atë takim me Biden.
“Autoritarizmi duhet të sfidohet dhe gjërat duhet të thërriten ashtu siç janë.”
Fushata e Biden e bëri këtë në nëntor, kur Trump përqafoi përdorimin e fjalës “parazitë” nga Hitleri në një tubim, gjithashtu në Neë Hampshire.
“Në një fundjavë kur shumica e amerikanëve nderonin heronjtë e kombit tonë, Donald Trump përsëriti si papagall gjuhën autokratike të Adolf Hitlerit dhe Benito Musolinit, dy diktatorë ndaj të cilëve shumë veteranë amerikanë dhanë jetën duke luftuar në Luftën e Dytë Botërore”, tha në një deklaratë në atë kohë zëdhënësi i fushatës së Biden, Ammar Moussa.
Në një mbledhje fondesh menjëherë pas kësaj, Biden u përqendrua në komentet “parazitë” të Trump.
“Një frazë specifike me një kuptim specifik. I bën jehonë gjuhës që keni dëgjuar në Gjermaninë naziste në vitet ’30,” tha ai.
“Dhe nuk është as hera e parë. Trump gjithashtu tha kohët e fundit, “gjaku i Amerikës po helmohet” – “gjaku i Amerikës po helmohet.” Përsëri, i bën jehonë të njëjtave fraza të përdorura në Gjermaninë naziste.”
Strategjia nuk është pa rreziqe. Siç pranoi një ndihmës i fushatës së Biden-it, disa votues mund t’i shohin krahasimet si një përshkallëzim të jashtëzakonshëm.
Por personi, të cilit iu dha anonimiteti për të folur për të menduarit e brendshëm të fushatës, tha se Trump po parashtron në mënyrë të qartë mënyrat autokratike në të cilat ai do qeverisë në një mandat të dytë dhe këto duhet të bëhen të qarta.
“Ne jemi në një territor të paparë në një mënyrë shumë, shumë negative, negative,” tha ish-senatori Ted Kaufman, një këshilltar prrej një kohë të gjatë i Biden, i cili kujtoi komentet e Trump pas tubimit në Charlottesville.
“Është pothuajse ironike që çështja që e bindi Biden-i për ta kandiduar për presidenti kundër Trumpit, tani po përsëritet sërish”.
Meacham tha gjithashtu se ai “shqetësohej se shumë amerikanë mund të preken nga” retorika.
“Kjo është një nga arsyet pse katastrofat kanë ndodhur diku tjetër në të kaluarën. Le të jemi të qartë: kjo nuk është një kohë e zakonshme. Trump nuk po thotë gjëra të zakonshme.”
Trump ka lavdëruar prej kohësh diktatorët dhe ka përdorur gjuhë raciste dhe anti-emigrante. Muajt e fundit ai i ka dyfishuar ato. Kur prezantuesi i Fox News, Sean Hannity u përpoq ta ngacmonte atë gjatë një interviste në nëntor për të thënë se nuk do abuzonte me pushtetin e tij, Trump tha se nuk do të ishte diktator “përveç ditës së parë”.
Trump është zotuar gjithashtu të caktojë një prokuror special për të “ndjekur” presidentin Biden dhe familjen e tij. Ai po planifikon një goditje të gjerë të emigracionit dhe dëshiron të ushtrojë më shumë autoritet mbi burokracinë federale.
Fushata e Trump nuk iu përgjigj një kërkese për koment.
Celinda Lake, një anketuese për fushatën e Biden 2020, tha se në fillim të këtij viti, ajo ishte e shqetësuar se votuesit mund të mos e merrnin seriozisht kërcënimin që paraqet një presidencë tjetër e Trump. Në focus grupet e asaj kohe, tha ajo, votuesit vunë re se, megjithëse Trump ndonjëherë “flet pa menduar”, presidenca e tij “nuk ishte një fatkeqësi”.
Ndërsa gjuha e Trump është bërë më e ashpër muajin e fundit, megjithatë, kjo ka ndryshuar.
“Ne po shohim në fokus grupe shumë më tepër njerëz që komentojnë se ai është shumë përçarës, se “nuk më pëlqen temperamenti i tij”, se “nuk më pëlqen personaliteti i tij”. Me të vërtetë ka filluar të kthehet kundër tij,” tha Lake.
“Ai ka shkuar shumë larg.”
Jim Messina, i cili udhëhoqi fushatën e rizgjedhjes së Barack Obamës në vitin 2012, tha gjithashtu se është e rëndësishme që fushata e Biden të theksojë “se ky djalë është edhe më i çmendur se sa ka qenë”.
“Nuk jam i shqetësuar që votuesit të dëgjojnë shumë për këto gjëra,” tha ai.
“Jam i shqetësuar se nëse nuk e denoncojmë me forcë këtë gjë, kjo bëhet e zakonshme.”
Ndihmësit e fushatës së Biden thanë se ky nuk është thjesht një debat për gjuhën dhe ata synojnë t’u tregojnë votuesve se çfarë do të thoshte një mandat i dytë më autokratik i Trump për të drejtat e tyre.
Për të ndihmuar në realizimin e kësaj, fushata nisi një reklamë televizive javën e kaluar, në spanjisht dhe anglisht, që e krahasonte Trump-in me ish-presidentin venezuelian dhe pasuesin e tij.
Në reklama, pamjet e Trump shkëlqejnë së bashku me ato të Hugo Chavez dhe Nicolas Maduro dhe një person që shfaqet duke lexuar në to, thotë se republikanët, “si diktatorët, duan të heqin gjërat, sigurimin tonë shëndetësor, të drejtat dhe liritë tona, madje edhe sigurinë tonë”.
VINI RE: Ky material është pronësi intelektuale e Politico
Përgatiti për Hashtag.al, Klodian Manjani
