Ende pa dalë informacioni publik nga institucionet ligjzbatuese, Ministri i Brendshëm Taulant Balla ka konfirmuar lajmin mediat për arrestimet në Durrës me urdhër të SPAK-ut për një person me rekorde kriminale dhe lidhje me drejtues policie në bashkëpunim për vrasje.
Balla ka përgëzuar policinë dhe SPAK-un për goditjen e grupit kriminal ku në pranga ka rënë Rexhep (Kep) Arapi.
Balla ka bërë edhe bilancin e procesit të vetëpastrimit në polici ku sipas tij janë 339 punonjës policie të proceduar apo arrestuar.
“Përgëzime Policisë së Shtetit dhe prokurorëve të SPAK për goditjen e një tjetër grupi kriminal në Durrës.
Revanshi i sundimit të ligjit ndaj krimit të organizuar po godet fort sëmundjen e vjetër të lidhjeve të krimit me policinë dhe drejtësinë. Në asnjë cep të territorit të kësaj republike s’mund të ketë më feude apo bajraqe, ku mbi ligjin dhe mbi qytetarët të jenë të fortët, të cilët edhe kur policia i shoqëronte tek dera e Komisariatit, ata dilnin po atë ditë nga dritarja me vendime të blera tek tezgat e drejtësisë së vjetër.
Hetimet në bashkëpunim me SPAK, prokuroritë e juridiksionit të përgjithshëm, SHISH dhe agjenci të tjera ligjzbatuese të vendeve partnere për punonjës të nivelit të parë drejtues apo zbatues, të dyshuar për shpërdorim detyre, korrupsion, vepra penale në fushën e narkotikëve, veprime arbitrare, lidhje/komunikime me krimin si dhe çdo veprim tjetër të paligjshëm vijojnë dhe rezultatet e këtij procesi janë domethënëse: 339 punonjës policie të arrestuar/proceduar deri më tani.
Këto operacione dhe këto rezultate janë vetëm fillimi i vendosmërisë tonë për të vijuar me luftën frontale kundër krimit të organizuar dhe vetëpastrimin e radhëve të Policisë së Shtetit nga ata elementë të cilët e dëmtojnë atë”-shkruan Balla.
