Kina zbuloi rregulla të reja që synojnë uljen e shpenzimeve për videolojërat në internet. Sipas projektrregulloreve, kompanitë e lojërave duhet të paralajmërojnë lojtarët që angazhohen në “sjellje të paarsyeshme të konsumit”.
Rregullat u publikuan nga Administrata Kombëtare e Shtypit dhe Publikimit të Kinës, e cila rregullon industrinë e lojërave. Ata i ndalojnë kompanitë që t’u japin lojtarëve shpërblime për hyrjen çdo ditë, shpenzimin e parave në lojë për herë të parë ose blerjet e njëpasnjëshme, raportoi Reuters.
Kompanitë gjithashtu do detyrohen të shfaqin mesazhe pop-up për lojtarët që përfshihen në “sjellje të paarsyeshme të konsumit”, sipas Associated Press.
Pekini po kërkon koment publik mbi rregulloret deri më 22 janar.
Kina është tregu më i madh në botë i lojërave, por Pekini ka punuar për të kufizuar përhapjen e varësisë nga lojërat mes të rinjve kinezë.
Në vitin 2021, rregullatorët ndaluan fëmijët nën 18 vjeç të luanin lojëra në internet për më shumë se tre orë në javë dhe kërkuan që kompanitë e lojërave të paraqesin verifikimin e emrit dhe moshës për të zbatuar këto kufizime.
Media shtetërore kineze i përshkruan lojërat si “opium shpirtëror” dhe “drogë elektronike” në atë kohë.
Sidoqoftë, kufizimet strikte ulën vlerën e aksioneve të korporatave kineze të lojërave, duke përfshirë Tencent dhe NetEase.
Ndërsa të dyja firmat u rimëkëmbën, njoftimi i së premtes dërgoi valë të ngjashme tronditëse në industri, me çmimin e aksioneve të Tencent që ra me 12.5% që nga e shtuna dhe NetEase me 16%. Tencent është botuesi më i madh në botë i videolojërave për nga të ardhurat.
