Peshkopët katolikë në Nigeri dhe Gana kanë kundërshtuar lejimin e priftërinjveë të bekojnë lidhjet e të njëjtit seks, pavarësisht deklaratës së fundit të Papa Françeskut që lejon rituale të tilla në rrethana të caktuara.
Konferenca e Peshkopëve Katolikë të Nigerisë (CBCN) dhe Konferenca e Peshkopëve Katolik të Ganës (GCBC) pohuan në deklarata të veçanta të mërkurën dhe të enjten, përkatësisht, se bekimi i martesave homoseksuale bie ndesh me ligjin hyjnor dhe mësimet e kishës.
“Konferenca e Peshkopëve Katolikë të Nigerisë siguron të gjithë popullin e Zotit se mësimi i Kishës Katolike mbi martesën mbetet i njëjtë. Prandaj, nuk ka asnjë mundësi në mësimin e Kishës për të bekuar bashkimet dhe veprimtaritë e të njëjtit seks. Kjo do shkonte në kundërshtim me ligjin e Zotit, mësimet e Kishës, ligjet e kombit tonë”, thuhej në të.
Peshkopët e Ganës, të cilët kanë kundërshtuar prej kohësh homoseksualitetin si një kërcënim për mbijetesën e racës njerëzore, deklaruan gjithashtu: “Dëshirojmë të ritheksojmë se priftërinjtë nuk mund të bekojnë bashkimet apo martesat e të njëjtit seks.”
Një dokument i lëshuar nga zyra doktrinore e Vatikanit të hënën lejoi priftërinjtë katolikë që të bekojnë çiftet e të njëjtit seks “rast pas rasti”.
Megjithatë, u theksua se procesi nuk synon të zëvendësojë sakramentin e martesës heteroseksuale, as nuk mund të bëhet gjatë një ceremonie apo liturgjie të rregullt kishtare.
Deklarata, sipas Vatikanit, do të pasqyronte se “Perëndia i mirëpret të gjitha” llojet e njerëzve, por se bekime të tilla nuk do legjitimonin situata ose marrëdhënie “të parregullta”.
Publikimi i dokumentit ngjalli zemërim dhe polemika publike, madje edhe një grup priftërinjsh britanikë debatuan kundër tij.
Të enjten, Konfraterniteti i Klerit Katolik të Mbretërisë së Bashkuar lëshoi një letër të nënshkruar nga 500 priftërinj duke këmbëngulur se vlerat tradicionale të Kishës janë “të pandryshueshme”.
