Koreja e Veriut u zotua të lëshojë tre satelitë të rinj spiunazhi, të ndërtojë drone ushtarake dhe të rrisë arsenalin e saj bërthamor në vitin 2024, pasi udhëheqësi Kim Jong Un tha se politika e SHBA-së po e bën luftën të pashmangshme, njoftuan mediat shtetërore të dielën.
Kim sulmoi Uashingtonin në komente të gjata duke mbyllur pesë ditët e takimeve të partisë në pushtet që përcaktuan objektivat ekonomike, ushtarake dhe të politikës së jashtme për vitin e ardhshëm.
“Për shkak të lëvizjeve të pamatura të armiqve për të na pushtuar, është një fakt i kryer që një luftë mund të shpërthejë në çdo kohë në gadishullin Korean”, tha ai, sipas agjencisë shtetërore të lajmeve KCNA.
Ai urdhëroi ushtrinë të përgatitej për të “paqësuar të gjithë territorin e Koresë së Jugut”, duke përfshirë edhe bomba bërthamore nëse është e nevojshme, në përgjigje të çdo sulmi.
Fjalimi i Kim vjen përpara një viti që do ketë zgjedhje të rëndësishme si në Korenë e Jugut ashtu edhe në Shtetet e Bashkuara.
Ekspertët parashikojnë se Koreja e Veriut do të mbajë një fushatë presioni ushtarak rreth zgjedhjeve presidenciale të SHBA-së në nëntor, të cilat mund të shohin kthimin e ish-presidentit Donald Trump, i cili zhvilloi një takim historik me Kim.
Administrata e presidentit Joe Biden thotë se është e hapur për bisedime, por ajo vendosi sanksione të reja pasi Koreja e Veriut vijoi me më shumë teste raketore të ndaluara sipas sanksioneve të Kombeve të Bashkuara.
Ministria e Mbrojtjes e Koresë së Jugut dënoi planet e Phenianit për të ecur përpara me ambiciet e tij bërthamore.
