Lideri i opozitës politike të Koresë së Jugut është goditur me thikë në një konferencë shtypi në qytetin port jugor të Busan.
Lee Jae-myung, i cili humbi ngushtë zgjedhjet presidenciale në 2022, u godit me thikë në anën e majtë të qafës të martën në mëngjes.
Sulmuesi është arrestuar në vendngjarje.
Lee pësoi një çarje prej 1 cm dhe u trajtua në spital ndërsa ishte i vetëdijshëm, thanë raportet. Policia tha se plaga e tij nuk ishte kërcënuese për jetën.
Sulmuesi, i cili dukej se ishte një burrë në të 60-at deri në të 70-at, thuhet se iu afrua zotit Lee duke i kërkuar një autograf, përpara se papritmas të hidhej përpara për ta goditur me thikë.
Burri nuk ka treguar identitetin dhe motivin e tij, tha agjencia koreano-jugore e lajmeve, duke cituar oficerët e policisë, sipas BBC.
Një zëdhënës i Partisë Demokratike të Koresë së zotit Lee tha se stafi mjekësor dyshonte për dëmtim të venës së tij jugulare, e cila bart gjakun nga koka në zemër. Z. Lee do t’i nënshtrohej një operacioni pasi ata ishin të shqetësuar për gjakderdhje të mëtejshme, tha zëdhënësi, Kwon Chil-seung.
Lee humbi ngushtë zgjedhjet presidenciale të 2022 – me një ndryshim prej 0.73% në vota – ndaj Presidentit aktual Yoon Suk Yeol, duke e bërë atë garën më të afërt presidenciale në historinë e Koresë së Jugut. Ai pritet gjerësisht të kandidojë në zgjedhjet e ardhshme presidenciale në 2027.
