Qeveria kubane do rrisë çmimet e benzinës dhe naftës në ishull me 500% nga 1 shkurti, si pjesë e një sërë masash që synojnë uljen e deficitit të madh buxhetor të vendit.
Karburanti në Kubë është subvencionuar nga qeveria e vendit për dekada dhe është ndër më të lirët në botë.
Çmimi i një litri benzinë do rritet nga 25 pesos kubane (0,20 dollarë) në 132 pesos (1,10 dollarë), një rritje prej 528%, ndërsa benzina premium do shkojë nga 30 pesos (0,25 dollarë) në 156 pesos (1,30 dollarë). një rritje deri në 520%, njoftoi të hënën në televizionin shtetëror ministri i Financave dhe Çmimeve, Vladimir Regueiro.
Në fund të muajit të kaluar, ministri i Ekonomisë Alejandro Gil pranoi se, me mungesën e valutës së huaj dhe nën një embargo ndëshkuese të SHBA-së prej dekadash, qeveria nuk mund të përballonte më subvencionimin e karburantit.
Rritja synon gjithashtu të mbyllë hendekun e çmimeve të krijuar nga subvencionimi. Ministri i Energjisë, Vicente de la O Levy tha më parë se karburanti tani ka çmimin e bazuar në kursin zyrtar fiks të këmbimit prej 24 pesos për dollar, ndërsa turistët që vijnë shkëmbejnë dollarë me kursin e tanishëm prej 120 pesos për dollar e gjelbër, i cili u prezantua nga qeveria në gusht 2022. Kjo u jep atyre një përparësi të padrejtë, shpjegoi zyrtari.
Autoritetet thanë se do krijohet një rrjet stacionesh shërbimi për turistët, të cilët do detyrohen të paguajnë karburantin në valutë.
Qeveria kubane, e cila subvencionon pothuajse të gjitha mallrat dhe shërbimet thelbësore në vend, njoftoi një paketë masash në fund të muajit të kaluar që synon adresimin e krizës ekonomike që ka pllakosur vendin. Ndër hapat është rritja e çmimit të cigareve, duhanit dhe shërbimeve bazë si gazi i lëngshëm, uji, gazi, transporti dhe energjia.
Sipas vlerësimeve zyrtare, ekonomia e ishullit u tkurr me 2% në vitin 2023, ndërsa inflacioni arriti në 30%.
Kuba ka qenë nën një bllokadë ekonomike të SHBA-së që nga fillimi i viteve 1960. Kufizimet u lehtësuan gjatë presidencës së Barack Obamës, por më vonë u rivendosën nën Donald Trump. Në tetor, Havana akuzoi SHBA-në për provokimin e një krize ekonomike në Kubë. Sanksionet e Uashingtonit kanë çuar në mungesa kritike të ushqimit, karburantit dhe ilaçeve në ishull, duke çuar në emigrim masiv, sipas qeverisë kubane.
