Në vitin 2100, SHBA mund të shpërndahet me mijëra qytete fantazmë. Kjo sipas një studimi të ri nga Universiteti i Illinois që sugjeron se pothuajse gjysma e rreth 30,000 qyteteve në SHBA do përballen me shpopullim deri në fund të këtij shekulli.
Këto qytete të prekura vlerësohet të përjetojnë shpopullim prej 12 deri në 23 përqind, një ndryshim rrënjësor demografik që ka të ngjarë të shkaktojë të gjitha llojet e ndërprerjeve në shërbimet bazë, duke përfshirë transportin, ujin e pastër, energjinë elektrike dhe qasjen në internet.
“Projeksionet sugjerojnë që deri në vitin 2100, të gjitha shtetet do kenë qytete që përballen me një lloj shpopullimi, me përjashtim të Distriktit të Kolumbias dhe Havait”, shkruajnë autorët e studimit.
Megjithatë, ata shtuan se gjendja do ndryshojë në gjithë vendin nga rajoni në rajon. Rezultatet tregojnë se 43 për qind e qyteteve amerikane po humbasin popullsinë, ndërsa 40 për qind po fitojnë popullsi dhe 17 për qind e mbetur tregojnë tendenca luhatëse.
“Numri i qyteteve të shpopulluara në Verilindje dhe Midwest do jetë më i lartë se në rajonet Jugore dhe Perëndimore. Në Kaliforni, bregdeti jugor mund të humbasë popullsinë, ndërsa bregu verior mund të fitojë popullsi. Edhe pse po rriten ndjeshëm që nga ky shkrim, Teksasi dhe Utah do shohin gjithashtu një pjesë të qyteteve të tyre duke pasur humbje të popullsisë,” shtuan ata.
Për të arritur këto gjetje, ekipi shikoi të dhënat e mbledhura nga viti 2000 deri në vitin 2020 nga Censusi në SHBA dhe Anketa e Komunitetit Amerikan. Duke përdorur pesë skenarë të mundshëm të klimës në të ardhmen, të njohur si rrugët e përbashkëta socio-ekonomike, ata përdorën modele matematikore për të parashikuar ndryshimet në popullsinë urbane.
Duke folur për Scientific American, autorja kryesore e studimit Uttara Sutradhar shpjegoi se disa variabla të ndryshëm do nxisin tendencat që ata identifikuan, duke përfshirë rritjen e çmimeve të pronave, rënien industriale, normat më të ulëta të lindjeve, nivelet e ndryshme të taksave shtetërore dhe ndikimet e ndryshimeve klimatike.
Për të përballuar këtë problem, studiuesit besojnë se SHBA-ja duhet të ketë një zhvendosje radikale të paradigmës nga planifikimi i bazuar në rritje dhe, në vend të kësaj, të fillojë të përqafojë parimet e përshtatshmërisë, modularitetit dhe multifunksionalitetit.
Më gjerësisht, është bërë e vërtetuar se popullsia globale do bjerë deri në fund të shekullit të 21-të.
Një studim në vitin 2020 arriti në përfundimin se popullsia e botës do arrijë kulmin në vitin 2064 me rreth 9.7 miliardë njerëz, përpara se të bjerë në 8.8 miliardë deri në vitin 2100. Një raport tjetër (më pesimist) argumentoi se popullsia globale do arrijë në 8.6 miliardë në 2050 dhe më pas do të bjerë në vetëm 7 miliardë deri në vitin 2100.
Studimi i ri është publikuar në revistën Nature Cities.
