Gati 40% e vendeve të punës në gjithë globin mund të ndikohen nga rritja e inteligjencës artificiale (AI), me ekonomitë me të ardhura të larta më të ekspozuara se tregjet në zhvillim dhe se vendet me të ardhura të ulëta, ka paralajmëruar FMN-ja në një raport të ri.
Në një postim në blog gjatë fundjavës, shefja e FMN-së, Kristalina Georgieva u bëri thirrje qeverive të trajtojnë “trendin shqetësues” dhe të ndërmarrin hapa në mënyrë që “të parandalojnë që teknologjia të nxisë më tej tensionet sociale”.
“Ne jemi në prag të një revolucioni teknologjik që mund të nxisë prodhimin, të nxisë rritjen globale dhe të rrisë të ardhurat në mbarë botën. Megjithatë, ajo gjithashtu mund të zëvendësojë vendet e punës dhe të thellojë pabarazinë”, tha Georgieva.
Raporti vuri në dukje se ndërsa automatizimi dhe teknologjia e informacionit historikisht kanë tendencë të ndikojnë në detyrat rutinë, AI është gjithashtu e aftë të ndikojë në punët që kërkojnë punëtorë shumë të kualifikuar.
Si rezultat, ekonomitë e përparuara përballen me rreziqe më të mëdha nga AI – por edhe më shumë mundësi për të shfrytëzuar përfitimet e saj – sesa ekonomitë e tregjeve në zhvillim, sipas FMN-së.
Raporti tregoi se në ekonomitë e përparuara rreth 60% e vendeve të punës mund të ndikohen nga AI, shkruan RT.
Megjithatë, afërsisht gjysma e vendeve të punës të ekspozuara mund të përfitojnë nga integrimi i AI-së, duke rritur kështu prodhimin, shkroi FMN.
Për gjysmën tjetër, aplikacionet e inteligjencës artificiale mund të “kryejnë detyra kyçe të kryera tani për tani nga njerëzit”, gjë që mund të zvogëlojë kërkesën për punë, duke çuar në paga më të ulëta dhe uljen e punësimit.
Në rastet më të skajshme, disa nga këto punë mund të zhduken plotësisht, paralajmëroi Georgieva.
Në tregjet në zhvillim dhe vendet me të ardhura të ulëta, nga ana tjetër, ekspozimi ndaj AI-së pritet të jetë përkatësisht 40% dhe 26%.
“Këto gjetje sugjerojnë se tregjet në zhvillim dhe ekonomitë në zhvillim përballen me më pak ndërprerje të menjëhershme nga AI. Në të njëjtën kohë, shumë prej këtyre vendeve nuk kanë infrastrukturën apo fuqinë punëtore të aftë për të shfrytëzuar përfitimet e AI-së, duke rritur rrezikun që me kalimin e kohës teknologjia mund të përkeqësojë pabarazinë midis kombeve,” përfundoi FMN.
