Disa punonjës ndihmash me agjencinë e refugjatëve palestinezë të Kombeve të Bashkuara UNRWA ndihmuan rrëmbimin e izraelitëve dhe armatosjen e Hamasit gjatë sulmit të tij më 7 tetor, pohoi New York Times të dielën duke cituar përmbajtjen e një raporti sekret të qeverisë izraelite.
Dosja dyshohet se jep hollësi mbi pretendimet e Izraelit për 12 punonjës të UNRWA-s që thuhet se kanë qenë të përfshirë në bastisje. Shtatë ishin mësues në agjenci dhe dy të tjerë punonin në shkollat e saj në funksione të tjera, ndërsa tre të tjerët ishin nëpunës, punonjës social dhe magazinerë. Dhjetë nga punëtorët dyshohet se ishin gjithashtu anëtarë të Hamasit.
Një këshilltar shkolle nga Khan Younis supozohet se ka punuar me djalin e tij për të rrëmbyer një grua izraelite, ndërsa një punonjës social nga Nuseirat thuhet se ka hequr trupin e një ushtari të vdekur izraelit në Gaza dhe ka ndihmuar në shpërndarjen e automjeteve dhe municioneve përpara bastisjes. Tre burra të tjerë dyshohet se morën mesazhe me tekst që i thërrisnin në pikat e takimit më 7 tetor, me një urdhër që u kërkonte të sillnin granata e raketa.
Dy zyrtarë amerikanë i thanë New York Times se ndërsa ishin informuar për akuzat izraelite, ata nuk i kishin verifikuar hollësitë. Uashingtoni ishte megjithatë i pari që ndërpreu fondet e UNRWA-s të premten, e ndjekur nga Kanadaja dhe mbi gjysmë duzine të tjera të shtunën.
Për shkak se UNRWA-s i mungojnë rezervat e parave të urgjencës, mund t’i duhet të kufizojë shërbimet jetike që ofron për rreth 5 milionë palestinezë duke filluar nga shkurti. Ndërprerja e financimit vjen në një kohë të pasigurt për banorët e Gazës, shumë prej të cilëve tashmë përballen me urine. Mbi 85% e tyre janë zhvendosur nga shtëpitë e tyre që nga fillimi i luftës, sipas OKB-së.
Akuzat e Izraelit erdhën vetëm disa ditë pasi Gjykata Ndërkombëtare e Drejtësisë urdhëroi Izraelin të ndërmarrë veprime për të parandaluar gjenocidin në Gaza, duke përfshirë lejimin e dërgesave të më shumë ndihmave për banorët e rrethuar të territorit.
Izraeli nuk i kishte zbuluar informacionet në lidhje me punëtorët e UNRWA-s për javë të tëra, i thanë medias izraelite Israel Hayom të shtunën tre diplomatë të paidentifikuar, duke pretenduar se qeveria e kishte mbajtur atë të fshehtë sepse “kishte një mirëkuptim në sistemin politik izraelit që UNRWA duhet të ruhet në Gaza, sepse është i vetmi organ funksional në Gaza dhe pa të, kaosi do ishte edhe më i madh.”
Megjithatë, ministri i Jashtëm Israel Katz të shtunën bëri thirrje që UNRWA të “zëvendësohet me agjenci të përkushtuara për paqen dhe zhvillimin e vërtetë”, duke kërkuar dorëheqjen e drejtorit të saj dhe Izraeli ka pretenduar më parë se agjencia është një front i Hamasit.
OKB-ja nisi një hetim mbi akuzat dhe menjëherë pushoi anëtarët e stafit të dyshuar për aktivitet terrorist, por Sekretari i Përgjithshëm Antonio Guterres u ka bërë thirrje vendeve perëndimore që të mos penalizojnë pa dallim të gjithë punonjësit e ndihmës.
