Shkolla e Magjistraturës ka ndryshuar rregullat për konkurrim për tu bërë pjesë shkollës.
Këshilli Drejtues i Shkollës ka hequr kërkesën për notë mesatare mbi 8 të lëndëve kryesore.
Këshilli Drejtues i Shkollës vendosi të ndryshohen kriteret me provimin e fazës së dytë në mënyrë që të parashikohet realizimi i provimit të pranimit.
Duket se vettingu në trupën e gjyqtarëve dhe prokurorëve i cili ka shkarkuar një numër të lartë prejt tyre dhe nevoja për më shumë njerëz të rinj ka bërë që Shkolla të ulë kriteret e pranimit.
Njoftimi i plotë:
Njoftohen të gjithë personat e interesuar për të marrë pjesë në provimin e pranimit në Shkollën e Magjistraturës, për vitin akademik 2024-2025 se:
Këshilli Drejtues i Shkollës, në mbledhjen e datës 29 janar 2024, vendosi të ndryshojë rregullimin e kriterit të mesatares së lëndëve, duke hequr kërkesën për notë mesatare mbi 8 (tetë) të lëndëve kryesore.
Dispozita e ndryshuar në Rregulloren e Brendshme të Shkollës, neni 10, pika d dhe d/1, parashikon se: ““d) ka notë mesatare të përgjithshme mbi 8 (tetë). Për të diplomuarit “juristë”, në programe në gjuhë të huaj jashtë vendit, parashikohet një koeficient vështirësie i barabartë me 1.2, i cili do të ponterojë mesataren e tyre faktike;
d/1) nota mesatare e përgjithshme del nga shumatorja e notave të të gjitha lëndëve të zhvilluara në ciklin e parë dhe të dytë të studimeve e pjesëtuar me numrin total të tyre.”.
Këshilli Drejtues i Shkollës vendosi të ndryshohen/shtohen dispozitat lidhur me provimin e fazës së dytë në mënyrë që të parashikohet realizimi i provimit të pranimit, faza e dytë, në dy ditë të ndryshme, ku në ditën e parë provimi do të bëhët vetëm për 5 (pesë) tezat e lëndëve, ndërsa ditën e dytë provimi do të bëhet vetëm me rastet praktike. Në ditën e dytë të fazës së dytë, provimi mbi raste praktike, u vendos të shtohet 1 (një) rast praktik në të drejtën administrative.
Provimi i pranimit në fazën e dytë do të ketë 400 pikë: 250 pikë në ditën e parë të provimit me 5 (pesë) teza dhe 150 pikë në ditën e dytë të provimit me 3 (tre) raste praktike.
Modeli i tezës së fazës së dytë të provimit, dita e parë, është si vijon:
MODEL TEZE (Faza e dytë, dita e parë) kandidatë për magjistratë, këshilltarë, ndihmës ligjorë
Totali i pikëve të çdo teze është 50 pikë.
Rubrika 1: Pyetje mbi koncepte
Rubrika 2: Pyetje krahasuese
Rubrika 3: Pyetje argumentuese
Rubrika 4: Arsyetim analitik
DATAT E PROVIMEVE
FAZA E PARË
Datë 22 prill 2024, ORA 8.00-13.00, Pallati i Koncerteve, Tiranë.
FAZA E DYTË
Datë 24 dhe 25 prill 2024, ora 8.00-13.00, Salla “Feti Borova”, Tirana Olimpik Park, Tiranë.
Për çështje të tjera lidhur me provimin do të ketë njoftim së shpejti.
