Presidenti i SHBA-së Joe Biden është zotuar të vërë veton ndaj një pakete të pavarur ndihme të propozuar nga republikanët për Izraelin, nëse ajo arrin të kalojë në Kongres. Ideja për të kaluar një paketë ndihme “të pastër”, jo e lidhur me sigurinë kufitare apo Ukrainën, u hodh nga kreu republikan i Kongresit, Mike Johnson javën e kaluar.
Një numër ligjvënësish të republikanëve kanë shprehur kundërshtimin ndaj një pakete të sigurisë kombëtare prej 118 miliardë dollarësh, e vendosur për t’u votuar në Senat këtë javë, e cila përfshin 60 miliardë dollarë ndihmë ushtarake për Ukrainën, 14 miliardë dollarë për Izraelin dhe afërsisht 20 miliardë dollarë për financimin e ndryshimeve të politikave kufitare të SHBA-së.
Në një deklaratë të publikuar nga Zyra e Menaxhimit dhe Buxhetit të hënën, Shtëpia e Bardhë u kërkoi të dy dhomave të Kongresit të hedhin poshtë projektligjin e Johnson vetëm për Izraelin, duke e quajtur atë “një tjetër manovër cinike politike” pasi administrata Biden kaloi “muaj duke punuar me një grup dypartiak” senatorësh për të arritur një marrëveshje të sigurisë kombëtare që siguron kufirin dhe ofron mbështetje për popullin e Ukrainës dhe Izraelit”.
Që në nëntor, koordinatori i Këshillit të Sigurisë Kombëtare për komunikimet strategjike, John Kirby, tregoi se Biden “do vërë veton” ndaj një projektligji të pavarur të ndihmës për Izraelin.
Johnson iu përgjigj kërcënimit të vetos së presidentit këtë javë duke e quajtur atë “një tradhti të aleatit dhe mikut tonë të madh Izraelit në kohën e tyre të nevojës së dëshpëruar”.
