Fika Juliana Putri, një shitëse 19-vjeçare në Xhakartën Lindore, planifikon të votojë në zgjedhjet presidenciale të Indonezisë javën e ardhshme për një ish-komandant të forcave speciale, dikur “të frikshëm”. Ajo e pëlqen atë, thotë, sepse ai është joshës.
Një lloj vizatimor i gjeneralit Prabowo Subianto – i prodhuar duke përdorur inteligjencën artificiale – është varur në tabela në gjithë Indonezinë. Është riprodhuar në xhupa dhe ngjitëse, dhe është paraqitur dukshëm në postimet e etiketuara nga #Prabowo që kanë rreth 19 miliardë shikime në TikTok.
Prabowo është ministër i Mbrojtjes i Indonezisë. Por në mediat sociale, avatari i tij i AI me faqe topolake teksa bën zemra me duar duket se ngacmon votuesit e Gen Z. Rreth gjysma e 205 milionë votuesve të Indonezisë janë nën 40 vjeç.
Zgjedhjet e përgjithshme të 14 shkurtit në Indonezi, demokracia e tretë më e madhe në botë, ofrojnë një paraqitje të shkurtër sesi AI gjeneruese mund të ndryshojë fushatën politike në shkallë të gjerë, thonë ekspertët.
Avaratër e krijuar nga AI ka qenë thelbësore për riemërtimin elektoral të Prabowo, i cili është shumë përpara në sondazhe. Në vend që ta portretizojë veten si një nacionalist të zjarrtë, siç bëri në dy kandidaturat e mëparshme të dështuara presidenciale, fraza e re e 72-vjeçarit është “gemoy” – që është zhargon indonezian për dikë që është i këndshëm dhe përkëdhelës.
Prabowo – dhe sozia e tij e krijuar duke përdorur teknologjinë nga firma amerikane Midjourney Inc – po udhëheq qindra kandidatë në përdorimin e mjeteve gjeneruese të AI për të shndërruar artin e fushatës, për të gjurmuar trendet e mediave sociale, për të ndërtuar chatbot interaktive dhe për të synuar votuesit.
Fushata Prabowo dhe Midjourney, udhëzimet e të cilave ndalojnë përdorimin e saj për fushatë politike, nuk iu përgjigjën kërkesave për koment.
“Këto janë zgjedhjet e para që po shohim që përdorin këto mjete në shkallë,” tha Katie Harbath, e cila ishte deri në vitin 2021 zyrtarja më e lartë e politikave zgjedhore në Meta dhe tani shkruan një buletin rreth teknologjisë dhe demokracisë.
Harbath, i cili shprehu habinë që mjetet e AI ishin përshtatur nga fushatat në Indonezi kaq shpejt, tha se ishte shumë herët për të gjykuar ndikimin e përgjithshëm elektoral të përdorimit të tillë “të pashembullt dhe novator” të teknologjisë.
Reuters intervistoi 26 njerëz për të vlerësuar përdorimin e teknologjisë së AI në fushatën e Indonezisë, duke përfshirë këshilltarë politikë, lobistë, drejtues të teknologjisë, ekspertë dhe artistë që krijojnë pamje gjeneruese të AI për politikanët.
Disa folën në kushte anonimiteti pasi nuk ishin të autorizuar të flisnin me media. Qeveria indoneziane ende nuk ka formuluar rregulla detyruese për përdorimin e mjeteve të AI.
Me vendet ku jeton një e treta e popullsisë së botës që shkojnë drejt qendrave të votimit këtë vit, duke përfshirë Shtetet e Bashkuara dhe Indinë, zgjedhjet në Indonezi janë një provë për mënyrën se si OpenAI do kontrollojë politikat e saj, sipas shtatë lobistëve dhe ekspertëve politikë.
Shumë nga mjetet e inteligjencës artificiale të përdorura në zgjedhjet e Indonezisë janë të mundësuar nga OpenAI, i thanë Reuters nëntë punonjës të lartë të fushatës. Kjo përfshin platformën e Prabowo, sipas bashkërenduesit të ekipit të tij digjital.
Pronari i ChatGPT, me qendër në San Francisko, muajin e kaluar zbuloi rregulla që ndalonin përdorimin e tij për fushatë politike mes frikës globale të ndërhyrjes së AI në zgjedhje. Këto përfshijnë ndalime për krijimin e pamjeve të njerëzve të tanishëm, përfshirë politikanë.
OpenAI tha se po hetonte chatbotet dhe mjetet politike të identifikuara nga Reuters në Indonezi se përdorin teknologjinë e tij. Ai tha se një rishikim fillestar nuk gjeti “asnjë provë” të përdorimit të mjeteve të tij në zgjedhje dhe se ishte e angazhuar për transparencë dhe përdorimin e informacionit të saktë.
Këshilltari politik Yose Rizal tha se aplikacioni Pemilu.AI që ai zhvilloi përdor softuerin GPT-4 dhe 3.5 të OpenAI për të krijuar strategji dhe fjalime të fushatës rajonale.
Këshilltari indonezian tha se ai ua ka shitur shërbimet e aplikacionit 700 kandidatëve legjislativë. Reuters nuk ishte në gjendje të konfirmonte në mënyrë të pavarur shitjet.
Pemilu.AI mbledh së bashku të dhënat demografike dhe shfleton mediat sociale dhe faqet e internetit të lajmeve, duke e lejuar atë të prodhojë fjalime, slogane dhe përmbajtje të mediave sociale të përshtatura për një zonë elektorale.
Kandidatët rendisin prioritetet e tyre politike dhe zgjedhin se si duan të portretizohen. Karakteristikat më të dëshiruara midis politikanëve që përdorin Pemilu.AI në Indonezi, kombi më i populluar në botë me shumicë myslimane, janë të qenit “të përulur” dhe “fetarë”, tha Rizal.
I pyetur për rregullat e OpenAI, Rizal tha se Pemilu.AI nuk angazhohet “në krijimin e fushatave politike”. Ai e përshkroi atë si një mjet komunikimi për të “mbështetur procesin e vendimmarrjes së kandidatëve”.
Ndalesa e radhës, India
Më pas, Rizal planifikon ta çojë platformën në Indi përpara zgjedhjeve të saj të përgjithshme, që priten deri në maj.
“Për shkak se Indonezia është para SHBA-së dhe Indisë, këto zgjedhje janë një nxemje,” tha ai.
Ai tha se Pemilu.AI ka bashkëpunuar ngushtë me Microsoft, i cili pret kompaninë në shërbimin e saj cloud Azure, për të siguruar që operacionet e saj janë në përputhje me rregulloret. Microsoft, i cili është një investitor i madh në OpenAI, tha se nuk komenton angazhimet e klientëve.
Rizal tha se ai po provonte një version të Pemilu.AI në AI të Google, pasi u kontaktua nga ekipi i tij i shitjeve. Google konfirmoi se Pemilu.AI kishte bërë punë paraprake duke përdorur AI dhe u bë klient i shërbimit cloud. Google tha se nuk ka kufizime në përdorimin e chatbot-it të tij Bard për fushata politike, përtej ndalimit të dezinformatave.
Zgjedhjet në Indonezi po testojnë kufijtë e asaj që disa kompani të AI e konsiderojnë si fushatë politike.
Rregullat e OpenAI, të përditësuara më 10 janar, ndalojnë përdorimin e teknologjisë së saj për çdo fushatë apo lobim politik, duke përfshirë prodhimin e materialeve të fushatës të personalizuara ose të synuara për demografi të veçanta.
Në të njëjtin muaj, OpenAI ndaloi zhvilluesin e një roboti për kandidatin demokrat për president të SHBA-së, Dean Phillips, hera e parë që ndërmori veprime mbi rregulla të tilla.
Mbështetësit e përdorimit të inteligjencës artificiale gjeneruese në zgjedhjet e Indonezisë thonë se ajo u ka dhënë kandidatëve legjislativë qasje në mjetet e personalizuara të fushatës që përndryshe do rezervoheshin për pretendentët kryesorë me buxhete më të mëdha.
Miratimi i vazhdueshëm i AI është krejtësisht i natyrshëm, tha Razi Thalib, i cili drejton ekipin dighital për një tjetër pretendent presidencial, Anies Baswedan, një ish-guvernator i Xhakartës.
“Ndoshta rezultatet e zgjedhjeve do çojnë në mësime të nxjerra pwr ato qw nuk funksionojnw që do rrisin shkallën e pwrshtatjes diku tjetër”, tha ai.
Një këshilltar i Ganjar Pranowo, kandidati i partisë më të madhe në parlament, konfirmoi se AI ishte përdorur gjithashtu për “fushatën e tij krijuese.
VINI RE: Ky material është pronësi intelektuale e Reuters
Përgatiti për Hashtag.al, Klodian Manjani
