Rajoni i Detit të Kuq është “në flakë” tashmë, ka thënë diplomati egjiptian Nabil Fahmi së fundmi.
Fahmi, ish-ministër i Jashtëm i Egjiptit, i cili tani është dekan i “Shkollës së Çështjeve Globale dhe Politikave Publike” në Universitetin Amerikan në Kajro, beson se Izraeli ka aftësinë të përdorë çdo sasi force që dëshiron në çdo fushë pa përgjegjësi.
“Izraeli e bëri atë në qytetin e Gazës, ata e bënë atë në Khan Yunis, dhe tani ata po e bëjnë atë në Rafah, ku përfundojnë duke vrarë më shumë palestinezë. Ata gjithashtu po krijojnë një problem serioz me egjiptianët në anën tjetër të kufirit”, tha diplomati. Ai shtoi se ka probleme të shumta në rajonin e Detit të Kuq.
“Çështja humanitare e palestinezëve, përpjekja e izraelitëve për të zhvendosur palestinezët përtej kufirit për të ulur dendësinë e palestinezëve në Gaza dhe implikimet e sigurisë kombëtare në kufirin e Egjiptit”, tha ish-ministri.
Duke komentuar sigurinë kufitare, diplomati theksoi se “është shumë e rrezikshme dhe ata nuk duhet ta luajnë këtë lojë”.
Të hënën, Afrika e Jugut i kërkoi Gjykatës Ndërkombëtare të Drejtësisë (ICJ) të shqyrtojë ndërhyrjen për të parandaluar sulmin e ardhshëm tokësor të Izraelit në Rafah, një qytet në Gazën jugore, për të parandaluar shkeljet e mëtejshme të të drejtave palestineze.
Mbi 85% e banorëve të territorit janë zhvendosur që kur Izraeli nisi një kundërsulm pas sulmit të Hamasit më 7 tetor që la mbi 1200 viktima e mbi 250 pengje. Ndërkohë numri i viktimave palestineze në Gaza deri tani është mbi 28 mijë e 700.
