Qeveria egjiptiane thuhet se ka filluar punën për një mur pranë kufirit të vendit me Gazën, mes frikës se një ofensivë e planifikuar tokësore nga ushtria izraelite do shtyjë deri në 1.4 milionë refugjatë lufte që tashmë ndodhen në qytetin kufitar të Rafahut jashtë enklavës palestineze.
Associated Press, New York Times dhe media të tjera raportuan ndërtimin të premten, duke cituar fotografi satelitore që tregojnë se toka po pastrohet dhe një mur po ngrihet.
Zyrtarët egjiptianë kanë kundërshtuar të diskutojnë qëllimin e projektit, por raportet sugjerojnë se ajo mund të jetë një “zonë e fortifikuar mbrojtëse” për të strehuar banorët e Gazës që ikin nga një operacion i madh ushtarak izraelit i planifikuar në qytetin palestinez.
Puna e ndërtimit filloi në fillim të këtij muaji, ndërsa Forcat e Mbrojtjes të Izraelit (IDF) filluan përgatitjet për një sulm tokësor në Rafah, streha e fundit e Gazës për civilët që ikin nga lufta me Hamasin. IDF-ja ka rrafshuar pjesën më të madhe të enklavës së rrethuar ndërsa gjuan për luftëtarët e Hamasit, duke vrarë afro 29,000 njerëz, sipas një vlerësimi nga autoritetet lokale shëndetësore.
Kajro ka këmbëëngulur që Izraeli të mos detyrojë refugjatët palestinezë të futen në territorin e tij. Megjithatë, me kaq shumë civilë të grumbulluar në Rafah dhe me shtetin hebre që zotohet të asgjësojë Hamasin, pala egjiptiane me sa duket po përgatitet për mundësinë e një krize humanitare që mund të rrezikojë marrëveshjen e saj të paqes të vitit 1979 me Izraelin.
Rafah tashmë është shënjestruar nga sulmet ajrore ditët e fundit, duke vrarë qindra njerëz.
New York Times, duke cituar një kontraktor të paidentifikuar të porositur nga ushtria egjiptiane, raportoi se muri prej pesë metrash i lartë do mbyllë një sipërfaqe prej pesë kilometrash katrorë në një zonë tampon pranë kufirit jugor të Gazës.
Ministri izraelit i Mbrojtjes Yoav Gallant pretendoi të premten se IDF-ja nuk do përpiqet të detyrojë banorët e Gazës të shkojnë në Egjipt.
“Ne respektojmë dhe vlerësojmë marrëveshjen tonë të paqes me Egjiptin, e cila është një gur themeli i stabilitetit në rajon si dhe një partner i rëndësishëm”, shtoi ai.
Deklarata e Gallant erdhi një javë pasi kryeministri izraelit Benjamin Netanyahu urdhëroi ushtrinë e tij të bënte plane si për evakuimin e civilëve nga Rafah, ashtu edhe për shkatërrimin e bastionit të fundit të Hamasit.
