Izraeli do vijojë të kundërshtojë njohjen ndërkombëtare të një shteti palestinez, ka thënë kryeministri izraelit Benjamin Netanyahu, duke paralajmëruar se kjo mund të parandalojë zgjidhjen e konfliktit në Gaza.
Netanyahu po i përgjigjej një raporti të mërkurën nga Washington Post, i cili citonte burime diplomatike të thoshin se SHBA-ja dhe disa vende arabe po diskutonin një plan për paqen afatgjatë midis izraelitëve dhe palestinezëve.
Propozimi thuhet se përfshin një armëpushim, lirimin e pengjeve të mbajtura nga Hamasi dhe “një afat kohor të caktuar për krijimin e një shteti palestinez, që mund të shpallet që në javët e ardhshme”, tha gazeta.
Udhëheqësi izraelit shkoi në X herët të premten për të sqaruar qëndrimin e tij mbi atë që ai e përshkroi si “bisedë për imponimin e një shteti palestinez në Izrael”.
“Izraeli do vijojë të kundërshtojë njohjen e njëanshme të një shteti palestinez”, shkroi ai në hebraisht.
Pas sulmit të Hamasit në Izrael më 7 tetor, në të cilin rreth 1200 njerëz u vranë dhe rreth 240 u morën peng, mbështetja ndërkombëtare për shtetin palestinez “do ishte një shpërblim i madh për terrorizmin e paparë dhe do parandalonte çdo zgjidhje paqeje në të ardhmen”, këmbënguli Netanyahu.
“Izraeli kundërshton plotësisht diktatet ndërkombëtare në lidhje me një zgjidhje të përhershme me palestinezët”, theksoi ai.
Një marrëveshje paqeje në Gaza mund të arrihet vetëm “përmes negociatave të drejtpërdrejta mes palëve, pa parakushte”, shtoi kryeministri.
Sipas Ministrisë së Shëndetësisë të Gazës, mbi 28,700 njerëz janë vrarë dhe 68,395 të tjerë janë plagosur në sulmet ajrore izraelite dhe operacionet tokësore në enklavën palestineze që nga 7 tetori.
