Izraeli ka kritikuar ashpër presidentin e Brazilit, pasi ai e akuzoi për kryerjen e gjenocidit në Gaza, duke i krahasuar veprimet e tij me Holokaustin.
Luiz Inácio Lula da Silva tha se fushata ushtarake e Izraelit ishte midis një “ushtrie shumë të përgatitur nga njëra anë dhe grave e fëmijëve nga ana tjetër”.
Izraeli akuzoi Lulën për banalizimin e Holokaustit dhe thotë se po lufton për të shkatërruar Hamasin dhe për të kthyer pengjet e marra nga grupi militant më 7 tetor.
Organizata kryesore hebraike në Brazil ka kritikuar gjithashtu komentet e Lulës.
Duke folur nga një samit i Bashkimit Afrikan në Etiopi, Lula tha: “Ajo që po ndodh në Rripin e Gazës me popullin palestinez nuk ka asnjë paralele në momentet e tjera historike. Në fakt, ajo ekzistonte kur Hitleri vendosi të vriste hebrenjtë. Nuk është një luftë ushtarësh kundër ushtarëve. Është një luftë midis një ushtrie shumë të përgatitur dhe grave e fëmijëve.”
Politikani veteran i krahut të majtë dënoi Hamasin pasi militant të armatosur vranë të paktën 1200 njerëz dhe kapën 253 pengje në një sulm të befasishëm ndaj Izraelit më 7 tetor.
Por që atëherë ai ka qenë kritik i zëshëm ndaj fushatës ushtarake hakmarrëse të Izraelit, për të cilën Ministria e Shëndetësisë e drejtuar nga Hamasi në Gaza thotë se ka vrarë më shumë se 28,800 njerëz, kryesisht gra dhe fëmijë.
Komentet e tij të fundit vijnë pasi kryeministri izraelit Benjamin Netanyahu u zotua se do të vazhdojë me një ofensivë në Rafah, qyteti më jugor i Gazës ku rreth 1.5 milionë njerëz janë larguar, përballë presionit në rritje ndërkombëtar.
