Një gjykatë e lartë në Itali vendosi se kthimi i emigrantëve të parregullt në një vend jo të sigurt është një “krim” dhe dënoi një kapiten anijeje italiane me një vit burg për shpëtimin e emigrantëve të parregullt nga Libia në Mesdhe dhe dorëzimin e tyre te rojet bregdetare libiane.
Gjykata e Kasacionit vendosi se dorëzimi i emigrantëve të parregullt te Rojet Bregdetare libiane në vitin 2018 ishte një krim, raportuan mediat italiane.
Gjykata shpalli vendimin në rastin e anijes italiane “Asso 28”, që shpëtoi 101 emigrantë të parregullt në det, 57 kilometra nga brigjet libiane në korrik 2018 dhe ua dorëzoi autoriteteve libiane, raportoi e përditshmja La Repubblica.
Dërgimi i emigrantëve të parregullt në Libi, i cili nuk është një vend i sigurt sipas Konventës Evropiane për të Drejtat e Njeriut, është një krim, shpjegoi e përditshmja.
Gjykata vendosi se kthimi i emigrantëve në Libi shkelte të drejtën e tyre për mbrojtje ndërkombëtare.
Giovanni Sotgiu, kapiteni i kompanisë private “Asso 28”, u dënua me një vit burg.
Megjithëse grupet e të drejtave të njeriut e mirëpritën vendimin, media vendase raporton se ky vendim mund të dëmtojë përpjekjet e qeverisë së koalicionit të krahut të djathtë të udhëhequr nga kryeministrja Giorgia Meloni.
Deti Mesdhe është një rrugë kryesore për emigrimin e parregullt drejt Evropës. Varkat e emigrantëve në vështirësi që kërkojnë ndihmë zakonisht shpëtohen nga organizatat joqeveritare evropiane në vend të autoriteteve evropiane.
Emigrantët e parregullt që arrijnë në Evropë zakonisht zbarkojnë fillimisht në Lampedusa, territori italian afër Afrikës së Veriut.
Një numër i madh emigrantësh të parregullt vdesin çdo vit duke kaluar Mesdheun, ose për shkak të mbytjes së varkave ose si rezultat i kushteve të vështira në udhëtim, si dehidratimi ose asfiksia.
