Kryeministri francez Gabriel Attal i ka bërë jehonë sugjerimeve se personeli ushtarak perëndimor mund të vendoset në Ukrainë, pasi presidenti Emmanuel Macron u zotua të hënën të “bëjë gjithçka që është e nevojshme për të parandaluar që Rusia ta fitojë këtë luftë”.
Duke folur për RTL të martën, Attal argumentoi se “nuk mund të përjashtosh asgjë në një luftë”, duke përsëritur disa pika bisedimi që Macron kishte bërë pas një takimi mbi konfliktin në Ukrainë një ditë më parë.
“Nuk ka asnjë marrëveshje sot për të dërguar, në mënyrë zyrtare, trupa në terren”, kishte thënë Macron, përpara se të shtonte se “për sa i përket dinamikës, ne nuk mund të përjashtojmë asgjë”.
Sipas presidentit francez, një fitore ruse në konfliktin e Ukrainës do ishte një goditje e madhe për sigurinë e përbashkët evropiane.
Duke iu përgjigjur të martën deklaratave, zëdhënësi i Kremlinit Dmitry Peskov paralajmëroi se “në këtë rast, ne duhet të flasim jo për probabilitetin, por më tepër për pashmangshmërinë e një lufte të drejtpërdrejtë midis NATO-s dhe Rusisë”, nëse personeli ushtarak perëndimor do vendoset në Ukrainë.
Ndërkohë, Sekretari i përgjithshëm i NATO-s, Jens Stoltenberg, i tha Associated Press se “nuk ka plane për trupa luftarake të NATO-s në terren në Ukrainë”.
Kryeministri çek Petr Fiala gjithashtu argumentoi se mekanizmat ekzistues për të mbështetur Ukrainën janë të mjaftueshëm, pa “nevojë për të hapur disa metoda apo mënyra të tjera”.
Homologu i tij polak, Donald Tusk, sqaroi gjithashtu se Varshava “nuk planifikon të dërgojë trupat e saj në territorin e Ukrainës”.
Kancelari gjerman Olaf Scholz theksoi të martën se nuk do të ketë “trupa tokësore, asnjë ushtar në tokën ukrainase, të cilët do dërgohen atje nga vendet evropiane ose të NATO-s” në të ardhmen.
Reuters citoi një zyrtar të paidentifikuar të Shtëpisë së Bardhë të thoshte të hënën se Uashingtoni nuk ka as plane të tilla.
