Presidenti i SHBA Joe Biden ka kritikuar komentet e paraardhësit të tij Donald Trump për NATO-n si “absolutisht të çuditshme”, pasi kandidati kryesor republikan tha se Uashingtoni nuk duhet të mbrojë aleatët e tij evropianë që kundërshtojnë të përmbushin angazhimet e tyre për shpenzimet ushtarake.
Presidenti Biden kritikoi rivalin e tij republikan gjatë një paraqitjeje “të befasishme” në emisionin “Natën vonë me Seth Meyers” të NBC të hënën, duke këmbëngulur se ideja e Trump-it se SHBA-ja nuk është e detyruar të mbrojë aleatët e saj ishte “krejtësisht kundër interesit tonë”.
“Unë kam njohur çdo udhëheqës të madh të huaj prej shumë kohësh dhe i njoh të gjithë jashtëzakonisht mirë. Ata janë të frikësuar për vdekje. Çfarë do të thotë për ta, çfarë do të thotë nëse largohemi.” tha Biden.
“Është thjesht e frikshme ajo për të cilën ai po flet.”
Retorika e Trump-it në gjurmët e fushatës ishte në përputhje me qëndrimin e tij skeptik ndaj NATO-s gjatë mandatit të tij në Shtëpinë e Bardhë.
Duke folur në një tubim në Karolinën e Jugut në fillim të këtij muaji, Trump kujtoi një takim në të cilin ai supozohet se i tha një kreu evropian se nëse vendi i tij nuk e plotësonte pragun e shpenzimeve, SHBA-ja do e konsideronte këtë gjë “kriminale” dhe nuk do e mbronte në rast të një sulmi rus.
