Instituti ‘TATA’ në Mumbai ka zhvilluar një pilulë që mund të parandalojë përsëritjen e kancerit dhe të zvogëlojë efektet anësore të trajtimit me 50%, raportoi të mërkurën Economic Times. Zhvillimi vjen pas një dhjetëvjeçari kërkimi.
Ilaçi i ri, ‘R+Cu’, përmban prooksidantë si resveratrol dhe bakër, të cilët mund të prodhojnë ‘radikale oksigjeni’ që luftojnë kancerin. Ato parandalojnë që qelizat që vdesin t’i shndërrojnë ato të shëndetshmet në kanceroze, ndërkohë që frenojnë lëvizjen e qelizave kancerogjene nga një pjesë e trupit në tjetrën, e njohur si “metastaza”.
Ilaçi mund të jetë efektiv në trajtimin e kancerit të pankreasit, mushkërive dhe të gojës, sugjerojnë studiuesit.
Ilaçi pritet të kushtojë vetëm 100 rupi (1.2 dollarë) në një kohë kur çmimi i trajtimit të kancerit është në rritje. ‘R+Cu’ është në pritje të miratimit nga Autoriteti i Sigurisë Ushqimore dhe Standardeve të Indisë (FSSAI) dhe ka të ngjarë të dalë në treg në qershor-korrik.
“Efektet anësore u testuan si te minjtë ashtu edhe te njerëzit, por testi i parandalimit u bë vetëm te minjtë. Do duhen rreth pesë vjet për të përfunduar provat njerëzore për këtë”, zbuloi kirurgu Dr Rajendra Badve nga Spitali Memorial Tata në intervistën për NDTV. Ai shtoi se “ka pasur sfida gjatë hulumtimit”, por përfundimisht është “një sukses i madh”.
Qendra ‘Tata’ është ndër objektet më të vjetra dhe më të mëdha të kërkimit të kancerit në botë, dhe financohet dhe kontrollohet nga Departamenti i Energjisë Atomike të Indisë.
Zhvillimi u raportua disa javë pasi presidenti rus Putin pretendoi se vendi i tij është në prag të zhvillimit të vaksinave kundër kancerit.
“Ne kemi arritur një çast të rëndësishëm në zhvillimin e vaksinave kundër kancerit dhe imunomodulatorëve të brezit të ardhshëme,” tha ai.
India ka shtuar 30 spitale të reja kundër kancerit në nëntë vitet e fundit dhe po punohet në dhjetë të tjerë, tha kryeministri Narendra Modi muajin e kaluar. Qeveria ka zhvilluar gjithashtu 150,000 qendra të quajtura ‘Ayushman Arogya Mandirs’, për të ndihmuar në zbulimin e hershëm të kancerit midis popullatave rurale.
India, kombi më i populluar në botë, ka disa nga normat më të larta të kancerit në Azi dhe sëmundja shihet si një shkak kryesor i shqetësimit nga qeveria. Numri i rasteve në vend parashikohet të rritet nga 1.46 milionë në 2022 në 1.57 milionë në vitin 2025, sipas Këshillit Indian të Kërkimeve Mjekësore.
