Fermerët francezë bllokuan sot trafikun rreth monumentit të famshëm “Arc de Triomphe”(Harku i Triumfit), në Paris, me traktorë dhe tufa bari, duke thënë se protesta kishte për qëllim shpëtimin e bujqësisë franceze, sipas “Le Monde”.
Policia franceze tha se kishte arrestuar 66 persona në protestë.
Fermerët u mblodhën rreth monumentit në rrugën Champs-Elysées.
Fermeri Axel Masson tha se rreth 100 bashkëmoshatarë të tij ishin mbledhur në rrethrrotullimin arterial nga ora 3 e mëngjesit në mënyrë paqësore dhe duke respektuar ligjin.
“Koordinimi Rural mbulon Harkun e Triumfit në mënyrë simbolike dhe paqësore”, tha sindikata e fermerëve në një deklaratë në platformën X, duke shtuar se kjo ishte një thirrje për të “shpëtuar” bujqësinë në Francë.
Sindikata tha se kërkonte veprim të shpejtë për të shpëtuar 45% të fermave që ishin në vështirësi financiare.
Masson tha se fermerët kishin vendosur një kurorë në kujtim të kolegëve të tyre që ishin shtyrë drejt vetëvrasjes për shkak të problemeve financiare, duke shtuar: “Shteti nuk na ka dëgjuar kurrë.”
