Shitjet e ‘Rolex’ arritën në 10 miliardë dollarë për herë të pare, pasi marka zvicerane e orëve fitoi pjesën e tregut, sipas një raporti nga Morgan Stanley.
Marka mbizotëruese zvicerane e orëve luksoze prodhoi 1.24 milionë orë në vitin 2023 me shitje prej 10.1 miliardë frangash zvicerane (11.5 miliardë dollarë).
Kjo është një rritje e fitimit prej 11% nga viti 2022, thanë në një raport të mërkurën analistët në Morgan Stanley dhe firma zvicerane LuxeConsult, duke shtuar se niveli i tanishëm i pjesës së tregut të Rolex është “i paparë”.
Prodhuesi i modeleve ‘Daytona’, ‘Submariner’ dhe ‘Datejust’ e rriti pjesën e tij të tregut me pakicë në pak më shumë se 30% ndërsa blerësit me shije të mirë kërkuan orët e prodhuara nga kompania me bazë në Gjenevë, që kontrollohet nga fondacioni ‘Hans Wilsdorf’.
Ky i fundit është një biznesmen gjerman i cili bashkëthemeloi markën në vitin 1908. Marka e orëve me çmim më të ulët Tudor, e cila është në pronësi të të njëjtit grup, kishte shitje prej rreth 545 milionë franga në vitin 2023, sipas vlerësimeve të Morgan Stanley.
“Asnjë markë tjetër luksoze nuk mund të pretendojë një pozicion kaq mbizotërues në sektorin e saj përkatës,” shkruajnë në raport analistët e Edouard Aubin i Morgan Stanley dhe Oliver Müller i LuxeConsult.
‘Louis Vuitton’, për shembull, kishte rreth 19% të tregut të çantave luksoze vitin e kaluar, thanë analistët.
Marka Rolex “mbetet numri 1 i padiskutueshëm në industrinë e orëve luksoze me shitje më të mëdha se ajo e pesë markave të mëposhtme ‘Cartier’, ‘Omega’, ‘Audemars Piguet’, ‘Patek Philippe’ dhe ‘Richard Mille’ së bashku,” thanë ata.
Raporti tregoi se shitjet e orëve luksoze zvicerane vijuan të sundoheshin nga një pjesë e vogël e markave me më shumë se 1 miliard franga në shitje vjetore. ‘Vacheron Constantin’, marka historike e kontrolluar nga ‘Richemont’, iu bashkua klubit elitar të shitjeve prej 1 miliard frangash për herë të parë në vitin 2023.
Në anën tjetër të spektrit, marka e njëjtë e ‘Sëatch Group AG’ shiti më shumë se 2 milionë ‘MoonSwatches’ në vitin 2023 dhe rreth 5.8 milionë orë në total me një çmim mesatar prej 141 frangash, thanë analistët. Kryesisht për shkak të suksesit të ‘MoonSwatch’, një bashkëpunim me ‘Omega’, ‘Swatch’ ishte marka e orëve me rritje më të shpejtë për të dytin vit radhazi.
Shifrat e Morgan Stanley dhe LuxeConsult janë vlerësime, pasi markat zvicerane të orëve, përfshirë Rolex, nuk i bëjnë të ditur shitjet e tyre individuale vjetore.
Një zëdhënës i Rolex nuk pranoi të komentonte raportin dhe vlerësimet e Morgan Stanley.
