Të drejtat e abortit pranohen gjerësisht në Francë sesa në Shtetet e Bashkuara dhe shumë vende të tjera, me sondazhet që tregojnë se rreth 80% e francezëve mbështesin faktin që aborti është i ligjshëm.
“Ne po u dërgojmë një mesazh të gjitha grave: trupi juaj ju përket juve dhe askush nuk mund të vendosë për ju,” u tha kryeministri Gabriel Attal deputetëve dhe senatorëve të mbledhur në kongres për një votim të veçantë nën tavanet e praruar të Pallatit të Versajës, jashtë Parisit.
Gratë kanë pasur të drejtë ligjore për abort në Francë që nga një ligj i vitit 1974 – të cilin shumë e kritikuan ashpër në atë kohë.
Por vendimi i Gjykatës së Lartë të SHBA-së i vitit 2022 për të anuluar vendimin Roe kundër Wade që njihte të drejtën kushtetuese të grave për abort, i shtyu aktivistët të shtynin Francën të bëhej vendi i parë që mbron në mënyrë eksplicite të drejtën në dokumentin e saj themeltar.
Të drejtat e abortit
Por masa nuk ishte e përjashtuar nga kritikat.
Udhëheqësja e ekstremit të djathtë Marine Le Pen tha se Macron po e përdorte atë për të fituar pikë politike, për shkak të mbështetjes së madhe për të drejtën e abortit në vend.
“Ne do të votojmë për ta përfshirë atë në Kushtetutë sepse nuk kemi asnjë problem me këtë,” u tha Le Pen gazetarëve përpara votimit në Versajë, ndërsa shtoi se ishte e ekzagjeruar ta quash atë një hap historik, sepse, tha ajo, “askush nuk është duke vënë në rrezik të drejtën e abortit në Francë”.
Pascale Moriniere, presidentja e Shoqatës së Familjeve Katolike, e quajti masën një humbje për aktivistët kundër abortit.
“Është (gjithashtu) një humbje për gratë,” tha ajo, “dhe, natyrisht, për të gjithë fëmijët që nuk mund ta shohin dritën.”
Moriniere tha se nuk kishte nevojë të shtohej e drejta e abortit në kushtetutë.
“Ne importuam një debat që nuk është francez, pasi Shtetet e Bashkuara ishin të parat që e hoqën atë nga ligji me shfuqizimin e Roe kundër Wade,” tha ajo. “Ka pasur një efekt paniku nga lëvizjet feministe, të cilat donin ta gdhendnin këtë në mermerin e kushtetutës”.
