Donald Trump përbën një kërcënim për gratë për shkak të pikëpamjeve të tij për abortin dhe duhet të pengohet që të kthehet në Shtëpinë e Bardhë, tha Zonja e Parë e SHBA-së Jill Biden.
Bashkëshorti i saj, presidenti amerikan Joe Biden, “e kaloi gjithë karrierën e tij duke ngritur lart gratë” në kontrast të plotë me kundërshtarin e tij kryesor në zgjedhjet e këtij viti, këmbënguli ajo në nisjen e fushatës “Gratë për Biden” në Atlanta, të premten.
Trump “kaloi një jetë të tërë duke na shkatërruar dhe zhvlerësuar ekzistencën tonë. Ai tallet me trupat e grave, nuk respekton arritjet tona dhe mburret për sulmet,” tha Zonja e Parë.
Pika e fundit duket të jetë një referencë ndaj një regjistrimi që u bë kryefjalë përpara zgjedhjeve presidenciale në 2016. Ai shfaqi një bisedë private në të cilën Trump mburrej për përfitimet e të qenit “yll” kur bëhet fjalë për marrëdhëniet me femrat.
Gjatë një interviste me Fox News të enjten, Trump tha se ai nuk e kishte vendosur ende numrin e javëve pas të cilave aborti duhet të ndalohet.
“Gjithnjë e më shumë po dëgjoj për 15 javë dhe nuk kam vendosur ende,” tha ai, duke shtuar se “ne e kthyem atë në shtetet ku i takon. Shumë shtete po marrin qëndrime shumë të forta.”
