Në një operacion të përbashkët të organizuar nga Organizata Kombëtare e Inteligjencës Turke (MIT) dhe Departamenti i Policisë së Istanbulit, janë arrestuar 7 persona, për të cilët u konstatua se i kanë shitur informacione shërbimit inteligjent izraelit, Mossad.
Sipas informacionit të marrë nga burime të sigurisë, MIT dhe ekipet e Degës Antiterrorizëm të Departamentit të Policisë të Istanbulit kryen një operacion kundër këtyre personave të cilët dyshohen se i kanë shitur informacione Mossad-it.
Gjatë operacionit janë arrestuar 7 persona të dyshuar. Thuhet se një nga të dyshuarit është Hamza Turhan Ayberk, një ish-nëpunës publik që merrte pjesë në programet e mëngjesit në televizion dhe se Mossad-i kontaktoi Ayberk përmes agjentit të tij të koduar “Victoria”, përcjell AA.
MIT tha se Ayberk, i cili ishte detektiv privat, i jepte informacione Mossad-it në këmbim të parave.
Ayberk, i cili u zbulua se kishte formuar një ekip, përfshirë zyrtarë publikë, për t’i dhënë informacione Mossad-it, përpiloi informacione për njerëzit dhe kompanitë e Lindjes së Mesme në Türkiye sipas udhëzimeve që mori.
Ayberk, i cili mësohet se ka marrë trajnime nga Mossad-i në Beograd në vitin 2019 në lidhje me punën që duhet bërë, fillimisht është përdorur nga shërbimi sekret izraelit për punë të thjeshta.
Ndërsa Hamza Turhan Ayberk përdorte aplikacione të fshehta të komunikimit nën drejtimin e Mossad-it. Ai merrte pagesa në kriptovaluta në mënyrë që ato të mos pasqyroheshin në të dhënat zyrtare.
Mësohet se Ayberk, i cili jo vetëm ka nxjerrë informacione, por edhe ka kryer kërcënime dhe ndjekje, i ka transferuar Mossad-it në çast vendndodhjet e personave të synuar me pajisjen gjurmuese që ka vendosur në automjetet e tyre, i ngacmonte këta persona dhe i ka kërcënuar kohë pas kohe.
