Me pankarta në duar “Larg duart nga Shushica” dhe “Shpëtoni Shushicën tonë”, banorët kanë dalë sërish në protesta pranë fshatit Kuç kundër projektit të ujësjellësit të ri të Himarës.
Banorët i kanë kërkuar kryeministrit Edi Rama të shkojë dhe t’i japë llogari, duke u shprehur se “pushtetin vetëm e vjedh, populli është thesari më i madh”.
“Të gjithë na kanë braktisur. Ftoj Ramën të vijë këtu, të na dalë përpara dhe të japë llogari deri në 1, sepse pushtetin vetëm e vjedh, populli është thesari më i madh. Ta ketë parasysh kryeministri, sepse nga ferra e vogël del lepuri i madh”, tha një nga banorët.
“Luftoni për të drejtat tuaja, asnjë nuk është me ju. Qeverinë e keni kundër, parlamentin e keni kundër, deputetët e zonës i keni kundër. Vetëm ju mund ti bëni derman këtij vendi. O sot, o kurrë më”, iu drejtua banorëve një nga protestuesit.
Ndërtimi i ujësjellësit të ri të Himarës devijon ujin e lumit të Shushicës, degë e Vjosës dhe aktivistë e banorët e kanë kundërshtuar duke u shprehur se rrezikon sipas tyre dëmtimin e ekosistemit.
Ky projekt parashikon devijimin e ujit nga Lëpusha – burimi kryesor i Shushicës, drejt qytetit të Himarës dhe fshatrave të tjerë të vijës bregdetare për t’u shërbyer rreth 80 mijë banorëve dhe turistëve të shumtë që pushojnë në rivierën e Jonit gjatë muajve të verës.
Lumi Shushicë është një prej degëve kryesore të lumit Vjosë, ky i fundit i shpallur Park Kombëtar në mars të vitit 2023. Një vit pas vendimit që u trumbetua nga qeveria, Shushica përballet me mundësinë e heqjes nga statusi i mbrojtur.
Sipas ekspertëve mjedisorë, projekti i ujësjellësit të Himarës, i financuar nga Banka Gjermane për Zhvillim, “Kreditanstalt für Wiederaufbau” (KfW) dhe Kuadri i Investimeve të Ballkanit Perëndimor (WBIF), planifikon të devijojë 140 litra ujë në sekondë nga lumit dhe rrezikon ta thajë plotësisht pjesën e sipërme të tij gjatë verës.
Shkencëtarët e huaj që merren prej vitesh me studimin e ekosistemit të Vjosës theksojnë se raporti i Vlerësimit të Ndikimit në Mjedis i cili ka shërbyer edhe për lëshimin e lejes së projektit, është i pabazuar në prova shkencore dhe është keqinformues.
