John Barnett kishte akuzuar prodhuesin e avionëve për hakmarrje ndaj tij pasi ai tregoi problemet që pa në fabrikën e Boeing 787 në Karolinën e Jugut.
Një sinjalizues i njohur që ekspozoi problemet e kompanisë ‘Boeing’, është gjetur i vdekur në shtëpinë e tij. John Barnett, ish-menaxher i cilësisë ngriti shqetësime për praktikat e prodhimit në fabrikën ‘787 Dreamliner’ të kompanisë në Karolinën e Jugut, u gjet i pajetë të shtunën në atë që dukej të ishte një plagë e vetëshkaktuar me armë zjarri, sipas zyrtarëve lokalë.
Informatori John Barnett, ishte në Charleston për një dëshmi lidhur me me një proces gjyqësor në të cilin ai akuzoi ‘Boeing’ për hakmarrje ndaj tij pas ankesave për cilësinë dhe sigurinë.
Problemet e cilësisë që përfshijnë projektimin dhe prodhimin e kanë pllakosur kompaninë ‘Boeing’ për vite me radhë, më së shumti pas rrëzimit të dy avionëve ‘Boeing 737 Max’ në 2018 dhe 2019, dhe përsëri që kur një panel shpërtheu në një fluturim menjëherë pas ngritjes nga pista dy muaj më parë.
Barnett paraqiti ankesën kundër ‘Boeing’ në Departamentin e Punës të SHBA-së në vitin 2017 nën Programin AIR21 për Mbrojtjen e Denoncuesve, i cili mbron punonjësit e prodhuesve të avionëve që raportojnë informacione në lidhje me shkeljet e sigurisë së transportuesit ajror. Ai u largua nga kompania atë vit.
Avokati i ‘Boeing’ dëgjoi dëshminë e Barnett të enjten dhe ai u mor në pyetje nga avokatët e tij të premten mbi gjysmën e ditës. Ata ishin planifikuar të përfundonin dëshminë të shtunën në mëngjes, tha Robert Turkewitz, avokati i Barnett për rastin.
Kur Barnett, 62 vjeç, nuk u shfaq të shtunën në mëngjes dhe nuk iu përgjigj telefonatave, Turkewitz tha se u shqetësua dhe thirri hotelin e Barnett. Ai më pas u gjet i vdekur në kamionçinë e tij në parkingun e hotelit.
Zyra e Hetuesit të Qarkut Charleston konfirmoi vdekjen, e cia tha se dukej të ishte “rezultat i një plage të vetëshkaktuar me armë zjarri”.
Departamenti i Policisë së Charleston vuri në dukje gjetjen e mjekut në një deklaratë dhe tha se ishte duke kryer një hetim.
“Detektivët po hetojnë në mënyrë aktive këtë rast dhe janë në pritje të shkakut zyrtar të vdekjes, së bashku me çdo gjetje shtesë që mund të hedhë më shumë dritë mbi rrethanat që lidhen me vdekjen e z. Barnett,” tha departamenti.
Avokati Turkewitz tha se përvoja e Barnett në ‘Boeing’ e kishte prekur thellë atë.
“Po rëndonte me të vërtetë shumë mbi të, ajo që po ndodhte, dhe duke i rijetuar të gjitha këto gjëra që kishin ndodhur dhe stresin që kishte shkaktuar,” tha Turkewitz.
Një gjykatës i së drejtës administrative me Departamentin e Punës po dëgjonte rastin e sinjalizuesit, i cili ishte në zbulim e sipër. Gjyqi ishte caktuar për në qershor.
Avokati Turkewitz tha se kishte në plan të vijonte me çështjen e Barnett, në emër të familjes së tij.
“Ajo që John dëshironte ishte të paktën që puna e tij të sillte një ndryshim,” tha ai.
Në një deklaratë, ‘Boeing’ tha: “Jemi të pikëlluar për vdekjen e z. Barnett dhe mendimet tona janë me familjen dhe miqtë e tij.”
I njohur si ‘Sëampy’ për shkak të rrënjëve të tij nga Luiziana, John Barnett punoi në ‘Boeing’ për gati 30 vite para se të dilte në pension në vitin 2017. Ai kishte punuar në fabrikën e ‘Boeing’ në Everett, Uashington, përpara se të transferohej në një fabrikë të re në North Charleston, në vitin 2010 për të punuar në ‘787 Dreamliner’ të ‘Boeing’, një avion me trup të gjerë që ishte avioni i ri më i rëndësishëm i kompanisë në një brez.
Pasi dy prej avionëve ‘737 Max’ të ‘Boeing’ u rrëzuan në 2018 dhe 2019, shqetësimet e Barnett për çështjet e cilësisë në kompaninë ‘Boeing’ u shfaqën dukshëm në The New York Times dhe media të tjera, si shembuj të problemeve të përhapura me prodhimin e kompanisë.
Barnett i tha NY Times në vitin 2019 se ai kishte zbuluar grupe copash titani që ishin varur mbi telat e kontrollit të fluturimit në disa avionë.
Barnett tha në intervista se ai i kishte kërkuar në mënyrë të përsëritur shefat e tij që t’i hiqnin copat, por ata e kishin kundërshtuar dhe e kishin zhvendosur në një pjesë tjetër të uzinës.
Administrata Federale e Aviacionit në vitin 2017 kërkoi që ‘Dreamliners’ të pastroheshin nga rrëshqitjet para se t’i dorëzoheshin linjave ajrore. Boeing tha në atë kohë se ishte në përputhje me atë direktivë dhe po punonte me një furnizues për të përmirësuar dizajnin e pajisjes problematike. Por kompania tha se çështja nuk paraqiste një çështje të sigurisë së fluturimit.
Barnett i tha gjithashtu The Times në vitin 2019 se ai i kishte raportuar administratës se pjesët me defekt ishin zhdukur, duke rritur mundësinë që ato të ishin instaluar në avionë.
Ai tha se shefat e tij i thanë të mbaronte dokumentet për pjesët që mungonin pa e kuptuar se ku kishin shkuar.
Administrata Federale e Aviacionit hetoi dhe zbuloi se ‘Boeing’ kishte humbur disa pjesë të dëmtuara.
“Një menaxher i cilësisë në ‘Boeing’, është linja e fundit e mbrojtjes përpara se një defekt t’i zbulohet publikut gjatë kohës së fluturimit,” tha Barnett për NY Times në vitin 2019.
“Dhe unë nuk kam parë ende një aeroplan jashtë Charleston ku unë do vendosja emrin tim duke thënë se është i sigurt dhe i përshtatshëm për fluturim.”
Barnett, i cili jetonte në Pineville, Lousiana, ndau shqetësimet e tij përsëri në intervistat me NY Times këtë vit, pasi pyetjet rreth çështjeve të cilësisë në ‘Boeing’ u rishfaqën pas një incidenti më 5 janar në të cilin një panel shpërtheu në një ‘Boeing 737 Max 9’ në ajër gjatë një fluturimi të ‘Alaska Airlines’.
“Me kalimin e viteve, ka qenë thjesht një rënie e vazhdueshme e cilësisë në Boeing”, tha Barnett, duke shtuar, “Ky nuk është një problem i serisë 737. Është një problem i Boeing.”
Boeing duhet “të kthehet në gjëra themelore”, tha ai.
“Ata duhet të kthehen në ndërtimin e aeroplanit 101.”
Nëna e Barnett, Vicky Stokes, tha në një intervistë të martën se përvoja e djalit të saj me ‘Boeing’ kishte pasur një ndikim të madh te ai, duke e bërë atë të dukej më i vjetër se tre vëllezërit e tij edhe pse ishte më i riu.
“Ai e mbajti këtë mbi supet e tij për kaq shumë vite,” tha ajo.
Në një intervistë në janar, Barnett tha se nuk fluturonte më me aeroplan për shkak të asaj që kishte parë gjatë kohës së tij në ‘Boeing’.
“Unë nuk do hipja në një aeroplan sot,” tha ai.
“Është e trishtueshme. Më thyen zemrën. Unë e dua ‘Boeing’. Më pëlqen ajo që ishte dikur.”
VINI RE: Ky material është pronësi intelektuale e NY Times
Përgatiti për Hashtag.al, Klodian Manjani
