Agjencia kryesore e ndihmës e OKB-së që operon në Gaza tha të shtunën se kequshqyerja akute po përshpejtohej në veri të enklavës palestineze ndërsa Izraeli përgatitej të dërgonte një delegacion në Katar për bisedime të reja për armëpushim mbi një marrëveshje pengjesh me Hamasin.
Agjencia e Kombeve të Bashkuara UNRWA, tha se një në tre fëmijë nën moshën dy vjeçare në Gazën veriore tani është shumë i kequshqyer, duke vënë më shumë presion mbi Izraelin për shkak të zisë së bukës.
Të premten, Izraeli tha se do dërgonte një delegacion në Katar për më shumë bisedime me ndërmjetësit pasi armiku i tij Hamas paraqiti një propozim të ri për një armëpushim me shkëmbim pengjesh dhe të burgosurish.
Delegacioni do udhëhiqet nga kreu i agjencisë së inteligjencës izraelite Mossad, David Barnea, tha një burim i njohur me bisedimet, me kryeministrin Benjamin Netanyahu që kërkon të mbledhë kabinetin e sigurisë për të diskutuar propozimin përpara fillimit të bisedimeve. Zyra e Netanyahut ka thënë se oferta e Hamasit ishte ende e bazuar në “kërkesa jorealiste”.
Përpjekjet dështuan më herët për të siguruar një armëpushim të përkohshëm përpara fillimit të muajit të shenjtë të Ramazanit një javë më parë, me Izraelin që tha se planifikon të nisë një ofensivë të re në Rafah, qyteti i fundit relativisht i sigurt në Gazën e vogël dhe të mbushur me njerëz pas pesë muajsh lufte.
Të premten, zyra e Netanyahut tha se ai kishte miratuar një plan sulmi në Rafah, ku më shumë se gjysma e 2.3 milionë banorëve të Gazës janë strehuar dhe se popullsia civile do evakuohej. Ai nuk dha asnjë kornizë kohore dhe nuk kishte asnjë provë të menjëhershme të përgatitjeve shtesë në terren.
Oferta e Hamasit, e shqyrtuar nga Reuters, parashikon lirimin e dhjetëra pengjeve izraelitë në këmbim të qindra palestinezëve të mbajtur në burgjet izraelite, gjatë një armëpushimi njëjavor që do lejonte më shumë ndihmë në Gaza.
Hamasi gjithashtu bëri thirrje për bisedime në një fazë të mëvonshme për përfundimin e luftës, por Izraeli ka thënë se është i gatshëm të negociojë vetëm një armëpushim të përkohshëm.
