Ish-presidenti Donald Trump pretendoi sërish se Partia Demokratike “urren Izraelin” dhe se hebrenjtë amerikanë që votojnë për demokratët “urrejnë” fenë e tyre, duke i bërë jehonë sulmeve të mëparshme që ai ka bërë ndaj demokratëve hebrenj.
“Unë mendoj se ata e urrejnë Izraelin,” tha Trump për demokratët. Ai më pas tha se demokratët “shohin shumë vota” mes amerikanëve që kundërshtojnë luftën Izrael-Gaza. Komentet ishin pjesë e një interviste të gjatë me ish-këshilltarin e tij Sebastian Gorka, të postuar në internet të hënën.
“Çdo person hebre që voton për demokratët e urren fenë e tij”, shtoi Trump.
Trump i bëri komentet në përgjigje të një pyetjeje nga Gorka në lidhje me thirrjen e kreut të shumicës në Senat, Charles E. Schumer javën e kaluar për “zgjedhje të reja” në Izrael.
Schumer, zyrtari më i lartë hebre në Shtetet e Bashkuara dhe një aleat i vendosur i Izraelit, tha në Senat të enjten se ai mendon se izraelitët e kuptojnë “më mirë se kushdo që Izraeli nuk mund të shpresojë të ketë sukses me qeverisjen që ka që kundërshtohet nga pjesa tjetër e botës” dhe do zgjidhte udhëheqës më të mirë nëse do mbaheshin zgjedhjet.
Schumer sugjeroi që Izraeli të mbajë zgjedhje të reja “pasi lufta të fillojë të mbyllet” për të lejuar qytetarët e tij të “shprehin vizionin e tyre për të ardhmen e pasluftës” dhe tha se rezultati i zgjedhjeve do varet nga izraelitët, jo amerikanët.
Por shumë republikanë i morën fjalët e Schumer si një sulm ndaj Izraelit, me udhëheqësin e pakicës në Senat, Mitch McConnell që e përshkroi thirrjen për zgjedhje të reja si “groteske”.
Trump, në intervistën e tij me Gorka-n pretendoi se udhëheqësi i shumicës së Senatit “ishte gjithmonë pro-izraelit” por se ai është “shumë anti-izraelit tani”.
“Kur i shihni ato marshime palestineze, edhe unë habitem se sa njerëz janë në ato marshime”, tha Trump. “Dhe djemtë si Schumer e shohin këtë gjithashtu dhe për të janë vota.”
Në një postim në X të hënën, Schumer tha se bërja e “Izraelit një çështje dypartiake vetëm e dëmton Izraelin dhe marrëdhëniet SHBA-Izrael”.
“Trump është duke bërë shaka me terminologji si ‘dypartiake ’ dhe ‘urrejtje’,” tha ai.
“Unë jam duke punuar në një mënyrë dypartiake për të siguruar që marrëdhëniet SHBA-Izrael të qëndrojnë për brezat që do vijnë, të mbështetur nga paqja në Lindjen e Mesme.”
Jonathan Greenblatt, shefi ekzekutiv i Lidhjes Anti-Shpifje, kritikoi vërejtjet e Trump.
“Akuzimi i hebrenjve për urrejtje të fesë së tyre sepse ata mund të votojnë për një parti të caktuar është shpifje dhe pa dyshim e rreme,” tha ai në një deklaratë.
“Udhëheqësit seriozë që kujdesen për aleancën historike SHBA-Izrael duhet të përqendrohen në forcimin, në vend të zbërthimit të mbështetjes dypartiake për Shtetin e Izraelit.”
Në një deklaratë për The Washington Post, zëdhënësi i Shtëpisë së Bardhë Andrew Bates tha se nuk ka “asnjë justifikim për përhapjen e stereotipave toksike dhe të rreme që kërcënojnë bashkëqytetarët. Asnjë.”
“Siç tha presidenti Biden, ai u nxit për të kandiduar për President kur pa neo-nazistët duke brohoritur ‘të njëjtën deklaratë antisemite që u dëgjua në Gjermani në vitet 1930’ në Charlottesville,” shtoi Bates. “Udhëheqësit kanë detyrimin të quajnë urrejtje atë që është urrejtje dhe të bashkojnë amerikanët kundër saj.”
Fushata e Trump shtoi kritikat e kandidatit të saj, duke sulmuar politikat e administratës Biden, demokratët në Kongres që kanë nënshkruar peticionet dhe vërejtjet e Schumer.
“Presidenti Trump ka të drejtë. Partia Demokratike është shndërruar në një kabalë të plotë anti-izraelite, antisemite, pro-terroriste”, tha në një deklaratë Karoline Leavitt, sekretarja kombëtare e shtypit e fushatës.
Kjo nuk është hera e parë që Trump ka vënë në shënjestër demokratët hebrenj.
Në ditën e fundit të ‘Rosh Hashanah’, festimi i Vitit të Ri hebre, Trump pretendoi vitin e kaluar se “hebrenjtë liberalë” që nuk e mbështetën atë po votonin “për të shkatërruar Amerikën dhe Izraelin”.
Në mars 2019, ai tha se Partia Demokratike është “anti-izraelite” dhe “anti-hebreje”. Më vonë atë vit, ai u përpoq ta cilësonte Partinë Demokratike si antisemite duke pretenduar se votuesit që mbështesin demokratët po tregoheshin “shumë jo besnikë ndaj Izraelit dhe popullit hebre”.
Trump ka shprehur vazhdimisht zhgënjimin e tij për mospopullaritetin e tij në mesin e votuesve hebrenj, një bllok që mbështeti Biden 70 për qind në vitin 2020, sipas sondazhit të vërtetuar të votuesve të Qendrës Kërkimore Pew.
Një sondazh i ndryshëm i Pew i kryer muajin e kaluar zbuloi se 79 për qind e amerikanëve hebrenj kanë një pikëpamje të pafavorshme për Trump-in, ndërsa 62 për qind favorizonin Biden-in.
I njëjti sondazh zbuloi se 35 për qind e hebrenjve amerikanë thanë se Trump mbështet njerëzit me besime fetare të ngjashme me ato të tyre të paktën disa herë, ndërsa 59 për qind thanë se ai e bën këtë “pak” ose aspak.
VINI RE: Ky material është pronësi intelektuale e Washington Post
Përgatiti për Hashtag.al, Klodian Manjani
