Unioni i Gazetarëve Shqiptarë ka dënuar ashpër incidentin e ndodhur gjatë konferencës për shtyp të kryeministri Rama ku ai preku me dorë gaztaren Ambrozia Meta.
Në një reagim zyrtar, UGSH-ja e cilëson incidentin cenim të Kodit të Etikës dhe integritetit fizik të gazetares.
Në deklaratë thuhet se ndërsa gazetarja Meta po kërkonte një përgjigje specifike për pyetjen e saj mbi përfitimet e mundshme të publikut për një projekt madhor turistik, kreu i qeverisë jo vetëm që iu shmang përgjigjes por përdori gjuhë intimiduese dhe cenim të integritetit fizik të gazetares. Unioni shprehj solidaritetin e plotë me gazetaren Meta duke dënuar selljen e kryeministrit Rama.
“Deklaratë e Unionit të Gazetarëve Shqiptarë
Prekja fizike e gazetares është cënim i Kodit të Etikës dhe i integritetit fizik, zoti Kryeministër!
Tiranë më 19 Mars 2024
Unioni i Gazetarëve Shqiptarë reagon ndaj replikave të Kryeministrit Edi Rama me gazetaren Ambrozia Meta, e cila në të drejtën e vet profesionale këmbëngulte për një përgjigje konkrete prej kryeministrit, në konferencën për shtyp me gazetarët në datën 19 Mars 2024. Kryeministri jo vetëm që nuk jepte një përgjigje konkrete për pyetjen specifike, por me një gjuhë replikuese dhe nga pozita e edukuesit moral shmangej nga detyrimi për të dhënë një shifër konkrete për përfitimet e mundshme publike prej njerit nga projektet më të mëdha në fushën e turizmit shqiptar.
Refuzimi dhe shmangia e Kryeministrit për përgjigje konkrete u bashkëshoqërua me një gjuhë intimiduese dhe me cënim të etikës, deri në cënim të integritetit fizik të gazetares.
Unioni i Gazetarëve Shqiptarë reagon ndaj këtij momenti dhe shpreh solidaritetin me kolegen Meta, e cila spikat si reportere kurajoze në kërkim të fakteve dhe të dhënave që synojnë transparencë publike dhe llogaridhënie prej qeverisësve.
Zyra Informuese
Unioni i Gazetarëve Shqiptarë”
