Kryeministri i Kosovës Kurti postoi mbrëmjen e djeshme një video në rrjetin e tij social Facebook duke thënë se njësitë e specializuara të ushtrisë serbe janë vërejtur shumë pranë kufirit me Kosovën.
Ai shtoi se njësitë janë zbuluar pranë fshatit Banjë në Zubin Potok si dhe fshatin Oslare pranë Bujanovcit.
Kurti thekson se forcat e sigurisë së Kosovës janë duke mbikëqyrur gjendjen ndërsa nënvizon se një afrim i mjeteve ushtarake serbe pranë kufirit nuk është i zakonshëm.
“Ditë më parë, Presidenti i Serbisë, Aleksandar Vuçiq, kërcënoi publikisht Kosovën, duke thënë se “Serbia do të presë momentin më të mirë të mundshëm dhe do ta shfrytëzoj mundësinë për të vepruar”. Sot gjatë ditës, njësi të specializuara të ushtrisë së Serbisë janë vërejtur vetëm disa metra larg kufirit me Kosovën, në afërsi të fshatit Banje të Zubin Potokut. Lëvizje të ngjashme janë regjistruar edhe në fshatin Oslare të Bujanovcit, në afërsi të kufirit me Kosovën. Jemi të vetëdijshëm se Forcat e Armatosura të Serbisë janë duke realizuar stërvitjet e rregullta dhe ato janë duke i përdorur si pretekst për të shkaktuar provokime të qëllimshme në afërsi të kufirit me Kosovën. Jemi duke vëzhguar me kujdes se a do të përpiqen ta kalojnë kufirin, gjersa edhe ky afrim i automjeteve të tyre ushtarake nuk është normal.” – shkruan Kurti.
