Kompanitë Big Tech po përballen me sfidën më të madhe prej shumë vitesh, pasi rregullatorët antitrust në dy anët e Atlantikut godasin praktikat e supozuara antikonkurruese që mund të çojnë në urdhra për ndarjen e Apple dhe Google.
Kjo nga ana tjetër mund të frymëzojë vëzhguesit në mbarë botën që të bashkohen, siç dëshmohet në numrin në rritje të hetimeve antitrust në vende të ndryshme pas hapjes së çështjeve në BE dhe SHBA. Që kur AT&T u shpërbë saktësisht 40 vjet më parë, asnjë kompani nuk është përballur me mundësinë e një shpërbërjeje të udhëhequr nga rregullatori në Shtetet e Bashkuara, deri tani.
Google ka thënë se nuk është dakord me akuzat e BE-së, ndërsa Apple tha se padia e SHBA është e gabuar për faktet dhe ligjin.
Në 1984, AT&T, e njohur gjithashtu si Ma Bell, u nda në shtatë kompani të pavarura të quajtura “Baby Bells” për të hapur një nga monopolet më të fuqishme të shekullit të 20-të. AT&T, Verizon dhe Lumen janë tani entitetet e vetme të mbijetuara.
Rregullatorët tani pretendojnë se kompani të tilla si Apple dhe Google, kanë ndërtuar ekosisteme të padepërtueshme rreth prodhimeve të tyre, duke e bërë të vështirë për klientët kalimin në shërbimet rivale.
Departamenti Amerikan i Drejtësisë paralajmëroi të mërkurën Apple, një kompani prej 2.7 trilionë dollarësh, se një urdhër për ndarje nuk përjashtohet si një mundësi për të rivendosur konkurrencën, pasi u bashkua me 15 shtetetë tjera për të paditur prodhuesin e iPhone për monopolizimin e tregut të smartfonëve dhe rritjen e çmimeve, duke penguar rivalët.
Megjithatë, ka të ngjarë të duhen vite për të vendosur çështjen, të cilën Apple është zotuar të luftojë.
Veprimet e SHBA-së vijnë pas kërcënimeve të tjera në rritje në gjithë Evropën këtë javë.
Big Tech do përballet me më shumë shqyrtim së shpejti me Apple, Meta Platforms dhe Alphabet që ka të ngjarë të hetohen për shkelje të mundshme të Aktit të Tregjeve Dixhitale (DMA) që mund të çojnë në gjoba të mëdha dhe madje edhe urdhra për ndarje lidhur me shkelje të përsëritura, i thanë Reuters të enjten njerëzit me njohuri të drejtpërdrejta për këtë çështje, në kushte anonimiteti.
Shefja e antitrustit të BE-së, Margrethe Vestager ndihmoi në hapjen e rrugës për masat drastike vitin e kaluar, kur ajo akuzoi Google për praktika antikonkurruese në biznesin e saj adtech.
Ajo tha se kërkesa e Google për të shitur disa nga asetet e saj dukej se ishte mënyra e vetme për të shmangur konfliktet e interesit pasi kjo do parandalonte Google që supozohet se favorizonte shërbimet e veta të teknologjisë së reklamimit dixhital në internet kundrejt reklamuesve dhe botuesve në internet.
Vestager pritet të nxjerrë një vendim përfundimtar deri në fund të vitit.
Ligjvënësi i Parlamentit Evropian, Andreas Schwab, i cili ishte shumë i përfshirë në hartimin e rregullave të rëndësishme të teknologjisë së BE-së DMA që nisën këtë muaj, tha se ligjvënësit duan veprime të guximshme kundër kompanive Big Tech që shkelin rregullat.
“Nëse ata nuk respektojnë DMA, ju mund të përfytyroni se çfarë do kërkojë Parlamenti.
Ndarja e vështirë
Nuk është e sigurt që rregullatorët do lëshojnë urdhrin e ndarjes pasi ata shqyrtojnë mundësitë dhe çdo veprim mund të çojë vetëm në gjobë. Ekspertët ligjorë sugjeruan gjithashtu se çështja kundër Apple, e nxjerrë nga çështja e vitit 1998 kundër Microsoft, mund të jetë më e vështirë këtë herë.
“Në Bashkimin Evropian, ka më pak traditë, me ndarjen e një kompanie që shihet si mjeti i fundit. Kjo nuk ka ndodhur kurrë më parë,” tha një zyrtar i Komisionit, duke folur në kushte anonimiteti.
Sistemi shumë i integruar i Apple do e bënte gjithashtu të vështirë ndarjen në krahasim me Google, tha avokati Damien Geradin në “Geradin Partners”, i cili po këshillon disa zhvillues aplikacionesh në raste të tjera kundër Apple.
“Më duket shumë më e ndërlikuar. Ju po flisni për diçka që është e integruar, për shembull nuk mund ta detyroni Apple të heqë dorë nga App Store. Kjo nuk ka kuptim,” tha ai.
Ai tha se do të ishte më mirë t’i imponoheshin mjete juridike sjelljes së Apple që e detyrojnë atë të bëjë disa gjëra, ndërsa në rastin e Google, një urdhër ndarjeje mund të synojë thjesht blerjet e bëra për të forcuar shërbimet e saj kryesore.
Apple merr pjesën më të madhe të të ardhurave të saj prej rreth 400 miliardë dollarë në vit nga shitja e pajisjeve – iPhone, Mac, iPad dhe Orë – e ndjekur nga biznesi i saj i Shërbimeve, i cili sjell afërsisht 100 miliardë dollarë në vit.
Mjetet juridike strukturore si ndarja do provohen përfundimisht në gjykata, tha Assimakis Komninos, partner në firmën ligjore “White & Case”.
“Unë do thosha se përvojat e masave të imponuara strukturore, si ndarjet, nuk janë të shumta, por përvoja e vogël e së shkuarës tregon se kjo është shumë e ndërlikuar, përveç sfidave të frikshme ligjore”, tha ai.
VINI RE: Ky material është pronësi intelektuale e Reuters
