Shtëpia e Bardhë hodhi poshtë me forcë të enjten akuzat ruse se SHBA-ja ose Ukraina kishin një rol në një sulm terrorist në një sallë koncertesh pranë Moskës ku humbën jetën 143 persona dhe tha se i dha Kremlinit paraprakisht një paralajmërim me shkrim për një sulm të mundshëm.
Zëdhënësi i Këshillit të Sigurisë Kombëtare, John Kirby, i përshkroi pretendimet si “të pakuptimta” dhe “propagandë” dhe tha se Rusia po përpiqet të largojë fajinduke drejtuar gishtin mbi “të gjithë të tjerët që nuk i përshtaten narrativave të tyre politike”.
Ai tha se përveç paralajmërimit publik të lëshuar më 7 mars nga Ambasada e SHBA-së në Moskë, e cila “identifikoi me saktësi kërcënimin terrorist të paraqitur për koncertet në Moskë”, SHBA “u përpoq të ndihmonte në parandalimin e këtij sulmi terrorist” duke i ofruar Kremlinit “informacione të qarta, të hollësishme” në një paralajmërim me shkrim për shërbimet ruse të sigurisë.
“Ne ia dhamë këtë informacion Rusisë sepse Shtetet e Bashkuara e marrin shumë seriozisht detyrën për të paralajmëruar. Ne kurrë nuk duam të shohim jetë të pafajshme të humbura në sulme terroriste dhe ky paralajmërim ishte një nga shumë paralajmërimet që qeveria e Shteteve të Bashkuara i ka kaluar Rusisë që nga shtatori 2023.”, tha Kirby.
“ISIS mban përgjegjësinë e plotë për këtë sulm. Shtetet e Bashkuara do vijojnë të qëndrojnë vigjilente dhe të kujdesshme për qeveritë në mbarë botën sa herë që mësojmë për komplote terroriste, pavarësisht nga marrëdhënia jonë,” shtoi ai.
Persona të armatosur hapën zjarr të premten ndaj pjesëmarrësve të koncertit në sallën e qytetit Crocus pranë Moskës. Autoritetet kanë konfirmuar se 143 viktima u vranë dhe më shumë se 360 u plagosën. Daesh/ISIS ka marrë përgjegjësinë për sulmin.
Kremlini ka kërkuar të fajësojë SHBA-në dhe Ukrainën për sulmin. Alexander Bortnikov, kreu i Shërbimit Federal të Sigurisë së Rusisë (FSB), akuzoi SHBA-në, Britaninë e Madhe dhe Ukrainën se qëndrojnë pas sulmit të javës së kaluar.
“Mund të them padyshim se ka një sfond politik. Dhe vetëm islamistët nuk mund të përgatisnin një veprim të tillë. Sigurisht, ata u ndihmuan. Dhe ne shohim gjurmën ukrainase në këtë. Të dhënat parësore që kemi marrë nga të arrestuarit konfirmojnë këtë”, u tha ai gazetarëve.
