Sindikata e Policisë Gjermane (DPolG) ka publikuar një video që tregon oficerët pa pantallona për të shprehur zhgënjimin për mungesën e uniformave.
Në videon që u shpërnda në rrjetet sociale të hënën, dy oficerë bëjnë një bisedë të shkurtër në makinën e tyre të patrullës.
“Sa kohë ke që pret?”
Njëri thotë katër muaj, tjetri gjashtë, para se të dalin nga BMW-ja e tyre për të treguar se janë pa pantallona.
Edhe pse videoja u publikua në ditën e 1 prillit, nuk ishte shaka, por një përpjekje për të tërhequr vëmendjen për mungesën e rëndë të uniformave, shpjegoi kreu i degës bavareze të DPolG, Jurgen Kohnlein, i cili gjithashtu shfaqet në video.
“Tani kemi arritur në pikën ku kolegët tanë nuk mund të lëvizin më në mënyrë të përshtatshme, me fjalë të tjera: me një uniformë të mirë”, tha ai.
Sipas tij, oficerët e policisë bavareze janë përballur me mungesa të uniformave për shkak të pengesave të zinxhirit të furnizimit që nga pandemia Covid-19.
“Policia e Bavarisë po “zhveshet” dhe fjalë për fjalë mund të lihet në këmbë pa pantallona,” tha Kohnlein, duke theksuar faktin se koha e pritjes për më shumë se 20 artikuj të ndryshëm, duke përfshirë kapele, xhaketa dhe pantallona, mund të zgjasë muaj. Ai shtoi se në shumë raste, oficerët duhet të punojnë me palën e fundit të pantallonave.
Sindikata i ka kërkuar Ministrisë së Brendshme që të adresojë menjëherë problemin, edhe nëse kjo do thotë kosto shtesë, duke theksuar se që nga viti 2020, ata “zakonisht kanë folur për mangësi në cilësinë e uniformave, por për mungesë të disponueshmërisë së uniformave. ”
