Presidenti amerikan Joe Biden ka thënë se po shqyrton kërkesën e Australisë për të hequr ndjekjen penale të themeluesit të WikiLeaks, Julian Assange.
Parlamenti i vendit kohët e fundit miratoi një masë – e mbështetur nga kryeministri Anthony Albanese – duke bërë thirrje për kthimin e Assange në vendlindjen e tij Australi.
SHBA dëshiron të ekstradojë Assange nga Britania e Madhe me akuza penale për rrjedhjen e të dhënave ushtarake.
Assange i mohon akuzat, duke thënë se rrjedhjet ishin një akt gazetarie.
Kur u pyet të mërkurën nëse ai kishte një përgjigje ndaj kërkesës së Australisë, zoti Biden tha: “Ne po e shqyrtojmë atë”.
Assange, 52 vjeç, po mbahet në burgun Belmarsh dhe po lufton ekstradimin e tij në gjykatat e Mbretërisë së Bashkuar.
Në një postim në X, dikur në Twitter, drejtuar Biden, gruaja e Assange tha: “Bëni gjënë e duhur. Hiqni akuzat”.
Ekstradimi i Assange u pezullua në mars pasi Gjykata e Lartë e Londrës tha se Shtetet e Bashkuara duhet të japin garanci se ai nuk do të përballet me dënimin me vdekje.
Prokurorët amerikanë duan të gjykojnë Assange në 18 akuza, pothuajse të gjitha sipas Aktit të Spiunazhit, lidhur me publikimin nga WikiLeaks të të dhënave konfidenciale ushtarake amerikane dhe kabllogrameve diplomatike në lidhje me luftërat në Afganistan dhe Irak.
Pasi Britania dha miratimin për ekstradimin e tij vitin e kaluar, avokatët e Assange në shkurt filluan një përpjekje të fundit në gjykatat angleze për të kundërshtuar largimin e tij.
