Sekretari i Përgjithshëm i Rithemelimit, Flamur Noka, komentoi ndalimin e kreut të IT-së në Policinë e Shtetit, Ervin Muça.
Në një deklaratë për mediat ai tha se lënia e tij në “arrest shtëpie” është prova e radhës se në Shqipëri është instaluar “drejtësia me regji”.
Sipas Nokës, arrestimi i Muçës është bërë për të shpëtuar ministrin e Brendshëm Balla, njësoj siç janë përdorur si “koka turke” drejtorët e Bashkisë Tiranë.
“Masa e pezullimit nga puna dhe ‘arrestit në shtëpi’ ndaj Ervin Muçës, është prova e radhës se në Shqipëri është instaluar ‘drejtësia me regji’. Ervin Muça u arrestua, jo se prokurorët nuk i kishin faktet, por se arrestimi i tij duhet bërë për të shpëtuar shefin e tij, Taulant Ballën. Nëse Tusha është ‘kokë turku’ për Veliajn dhe Ahmetaj për Ramën, Ervin Muça shërben si i tillë për Taulant Ballën. Ervin Muça ka ardhur në krye të Departamentit IT në Policinë e Shtetit disa ditë para emërimit Ministër i Brendshëm të Taulant Ballës. Sipas denoncimit të ekspertit të IT Gent Progni, Muça sapo erdhi, urdhëroi verbalisht punonjësit e databazës dhe serverave të kryejnë eksportim të bazës së të dhënave të TIMS, në një hard-disk të jashtëm, përfshirë këtu hyrje-daljet e personave, dokumentet biometrike, gjeneralitetet, ngjarjet kriminale dhe jo kriminale, aksionet e policisë, dosjet hetimore, lista terroristësh, gjobat e makinave, informacion territorial sekret, etj.” – tha Noka.
Ai shtoi më tej se grabitja e të dhënave të sistemit TIMS nga Muça, punonjës pa certifikatë sigurie dhe pa kaluar në veting ka rënë në vesh të shurdhër pavarësisht denoncimit të opozitës.
“Refuzimit të punonjësve, Muça, në stil tipik mafioz, i gjeti zgjidhjen duke marrë një kompani nga jashtë të quajtur Soft Solution dhe bëri eksportimin ilegal të të dhënave. Grabitësit e TIMS, me “porosi nga lart”, janë paraqitur si punonjës IT të QKB dhe të një kompanie tjetër të quajtur Horizon, me lidhje të dyshimta në Qipro, një parajsë fiskale. Kjo grabitje e të dhënave sensitive policore nga një person në atë kohë pa certifikatë sigurie dhe i pavetuar, pavarësisht denoncimeve të PD dhe ekspertëve, ra në vesh të shurdhër. Një vit më vonë ka ardhur urdhër-arresti kur në fakt, bashkë me të duhet të ishte sponsori dhe shefi i tij në krim, Taulant Balla. Ervin Muça është i njëjti hajdut me çizme i Rilindjes që vodhi edhe sistemin e pagave nga Drejtoria e Tatimeve kur punonte aty dhe i bëri publike.” – shtoi Sekretari i Përgjithshëm i Rithemelimit.
Në fund Noka tha se të dhënat e shqiptarëve marra nga TIMS u janë shitur grupeve kriminale. Ai tha gjithashtu se pavarësisht se grabitja e të dhënave nga Muça duhet hetuar nga SPAK, ai po hetohet nga Prokuroria e Tiranës.
Sipas Nokës, rënia e ministrit Balla do çonte në rënien e qeverisë por kjo s’mund të lejohet nga kryeministri Rama, i cili është partner në krim me Ballën, mbylli Noka denoncimin.
“Të dhënat e qytetarëve shqiptarë të marra nga TIMS janë përdorur për t’ua shitur grupeve kriminale për të kontrolluar rivalët e tyre. Emërimi i tij nga Taulant Balla, porosia që të merrte të dhënat e sistemit TIMS, duket sërish edhe te pezullimi i tij dhe urdhri i arrestit shtëpiak nga Prokuroria e Tiranës. Vepra e kryer prej tij dhe porositësve të tij është qartësisht nën juridiksionin e SPAK. Jo vetëm si përfshirje e lartë shtetërore, por edhe për objektin e hetimit, që janë të dhënat sensitive të sigurisë kombëtare. Arrestimi i Ervin Muçës është kryer nga drejtësia me regji për të shmangur rënien në pranga të një tjetër ministri të Edi Ramës. Me rënien e ministrit të Brendshëm, bie edhe qeveria dhe këtë Edi Rama nuk mund ta pranojë. Këtë as drejtësia medemek e re nuk mund ta pranojë. Ata që janë partnerë në krim mbrojnë njëri-tjetrin derisa të bien të gjithë bashkë dhe kjo dite po afron.” – mbylli denoncimin Noka.
