Malak Haniyeh, mbesa e kryetarit të byrosë politike të Hamasit, Ismail Haniyeh, u dorëzua të hënën nga plagët e marra në një sulm izraelit që vrau anëtarë të tjerë të familjes në ditën e parë të festës myslimane të Fitër Bajramit, thanë burimet mjekësore për Anadolu.
Tre djemtë e Haniyeh, së bashku me disa nga nipërit e tij, u vranë të mërkurën në një sulm ajror izraelit në një kamp refugjatësh në qytetin perëndimor të Gazës.
Sulmi ajror izraelit shënjestroi një makinë që mbante anëtarë të familjes Haniyeh në kampin e refugjatëve Al-Shati teksa po u jepnin urime banorëve të kampit për festën myslimane të Fitër Bajramit, thanë dëshmitarët okularë për Anadolu.
Burimet mjekësore thanë për Anadolu se sulmi ajror rezultoi në vdekjen e tre prej djemve të Haniyeh — Hazem, Amir dhe Mohammed — si dhe disa nga fëmijët e tyre, përveç plagosjes së të tjerëve.
Izraeli ka zhvilluar një ofensivë vdekjeprurëse ushtarake në Rripin e Gazës që nga një sulm ndërkufitar i 7 tetorit 2023 nga grupi palestinez Hamas, në të cilin u vranë afro 1200 njerëz.
Më shumë se 33,700 palestinezë, kryesisht gra dhe fëmijë, janë vrarë që atëherë në Gaza dhe rreth 76,400 të tjerë janë plagosur në mes të shkatërrimit në masë dhe mungesës së nevojave.
Lufta izraelite ka shtyrë 85% të popullsisë së Gazës në zhvendosje të brendshme mes mungesës akute të ushqimit, ujit të pastër dhe ilaçeve, ndërsa 60% e infrastrukturës së enklavës është dëmtuar ose shkatërruar, sipas OKB-së.
Izraeli akuzohet për gjenocid në Gjykatën Ndërkombëtare të Drejtësisë. Një vendim i përkohshëm në janar urdhëroi Tel Aviv-in të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza.
