Arabia Saudite mori pjesë në rrëzimin e disa droneve iraniane gjatë sulmit të së shtunës në Izrael, ka pranuar një burim në familjen mbretërore në përgjigje të një raporti të transmetuesit publik izraelit “Kan”.
Sipas Forcave të Mbrojtjes të Izraelit (IDF), sulmi i Teheranit përfshinte 170 dronë, më shumë se 30 raketa lundruese dhe më shumë se 120 raketa balistike. Sulmet erdhën si hakmarrje për bombardimin e konsullatës iraniane në Damask, Siri, që la të vdekur disa oficerë të lartë ushtarakë iranianë në fillim të këtij muaji.
Shtetet e Bashkuara, Britania e Madhe, Franca dhe Jordania ndihmuan IDF-në të kapte pothuajse të gjitha predhat në hyrje gjatë sulmit të së shtunës. Sipas “Kan”, në përpjekje u bashkua edhe Arabia Saudite.
“Një burim nga familja mbretërore saudite, i cili preferon anonimitetin ka folur me “Kan” dhe e ka pranuar në mënyrë delikate rolin e mbretërisë, duke deklaruar se mbrojtja ajrore e Riadit automatikisht kap çdo entitet të dyshimtë”, sipas faqes zyrtare të dinastisë al-Saud.
I njëjti burim akuzoi Iranin për nxitjen e konfliktit në Gaza midis Izraelit dhe Hamasit, duke akuzuar Teheranin për përpjekje për të “zbërthyer përparimin” në normalizimin e marrëdhënieve midis Arabisë Saudite dhe Izraelit.
“Irani është një komb që mbështet terrorizmin dhe bota duhet ta kishte kufizuar atë shumë më herët”, tha zyrtari pa emër për “Kan”.
Deklaratat e familjes mbretërore anonime do përfaqësonin një ndryshim nga retorika e fundit saudite, e cila ka dënuar sulmin e Izraelit kundër palestinezëve në Gaza, ndërsa punon për t’i dhënë fund armiqësisë së gjatë me Iranin.
Mbretëria muslimane sunite ka qenë prej kohësh aleate me SHBA-në dhe ka ndihmuar në goditjen e muslimanëve shiitë në vende si Bahreini dhe Jemeni, duke besuar se ata janë përfaqësues të republikës islame.
Riadi dhe Teherani ranë dakord të rivendosin marrëdhëniet diplomatike në mars 2023, në një marrëveshje të ndërmjetësuar nga Kina.
