Google ka shkarkuar 28 punëtorë që protestuan kundër lidhjeve të kompanisë me qeverinë izraelite në mes të luftës në Gaza. Gjiganti amerikan i teknologjisë pretendoi se punonjësit o prishnin procesin e zakonshëm të punës.
“Pengimi fizik i punës së punonjësve të tjerë dhe pengimi i tyre për të hyrë në objektet tona është një shkelje e qartë e politikave tona dhe sjellje krejtësisht e papranueshme”, tha një zëdhënës i Google në një deklaratë për mediat të mërkurën.
“Pas kundërshtimit të kërkesave të shumta për t’u larguar nga mjediset, forcat e rendit u përfshinë për t’i larguar e për të garantuar sigurinë e zyrës.”
Sipas ‘Verge’, një grup punonjësish pushtuan zyrën e kreut të Google Cloud, Thomas Kurian në Sunnyvale, Kaliforni të martën, ndërsa një grup tjetër organizoi një ulje gati tetë orëshe në zonën e përbashkët të zyrës së kompanisë në Nju Jork. Punëtorët e pakënaqur demonstruan gjithashtu jashtë disa kampuseve të Google.
Grupi aktivist që qëndron pas demonstratave – Jo Teknologji për Aparteidin – pretendoi se protestat “nuk dëmtuan pronën apo kërcënuan punëtorët e tjerë” dhe kishin “marrë një përgjigje jashtëzakonisht pozitive dhe mbështetje” nga kolegët.
Disa punonjës kanë folur publikisht që nga viti 2021 kundër Projektit Nimbus, një kontratë e madhe kompjuterike ‘cloud’, e nënshkruar nga Google dhe Amazon me qeverinë izraelite. Revista Time raportoi këtë muaj se Ministria e Mbrojtjes e Izraelit ka një pikë hyrjeje sigurie në Google Cloud dhe shërbimet e tij të Inteligjencës Artificiale.
Grupe të shumta të të drejtave të njeriut kanë akuzuar ushtrinë izraelite për vrasjen pa dallim të civilëve në Gaza, ku gati 34,000 palestinezë kanë vdekur që nga 7 tetori, sipas autoriteteve lokale. Ushtria izraelite pranoi se kishte vrarë aksidentalisht shtatë punonjës të huaj humanitarë gjatë sulmeve të 1 prillit me dron mbi një autokolonë ndihmash.
